Di nameya li ser The Guardianê hate weşandin de îmzevanan festîvalên fîlman ên li gel hikûmeta Îsraîlê kar dikin, şîrketên çêkirin û belavkirinê û saziyên sînemayê hedef girtin.
Daxuyanî bi înîsiyatîfa Film Workers for Palestineyê hate amadekirin û şibandin tevgera boykota çandî ya serdema apartheida li Efrîqaya Başûr.
Sînemageran diyar kir bang ne ji bo şexsên Îsraîlî ye, li ‘’saziyên hevkar’’ hatiye kirin. Name ji aliyê kesên weke Ava DuVernay, Riz Ahmed û Josh O’Connor ve jîhate îmzekirin.
Di nameyê de ev yek tê gotin: ‘’Di vê serdema krîzê de ku gelek welatên me komkujiya li Xezeyê erê dikin, li hemberî vê hevkariya sûcî divê em ya ji destê me tê, bikin.’’
Îmzevan bi awayekî eşkere armanc dikin ku hevkariya xwe ya li gel festîval, sînema, weşangêr û şîrketên çêkirin ên li hemberî ‘’komkujî û apartheidê’’ erê dikin û wan mafdar nîşan didin, bi dawî bikin.
Li gorî hunermendên ku weke mînak Festîvala Fîlman a Qudsê û Festîvala belgefîlman a Docavivê nîşan didin, ev festîval ‘’hevkariya xwe ya li gel Îsraîlê didomîne.’’
Di nameyê de rexneya; ‘’Piraniya şîrketên fîlman ên çêkirin û belavkirinê yên Îsraîlê, nûnerên bazirganiyê, sînema û saziyên din sînemayê, mafên gelê Filistînê yên di qada navneteweyî de hatine naskirin, tu caran bi awayekî tam nas nekirine’’ tê kirin.
Tê diyarkirin ku ev banga boykotê ‘’ne nasnameyê, hevkariya saziyan hedef digire’’ û ‘’welatiyên Îsraîlê hedef nagire.’’
Hêjayî bibîrxistinê ye ku di demên dawîn de beriya festîvalên fîlman ên weke Venedîk û Cannesê jî danezanên bi vî rengî hatin weşandin û gelek derhêrên navdar û lîstikvanan êrîşên Îsraîlê yên li ser Xezeyê şermezar kiribûn.
