Xizm û parastvanên parlamenterê AKP’ê yê berê Îbrahîm Halîl Yildiz di 14’ê hezîrana 2018’an de li navçeya Pirsûs a Rihayê hevjîn û du kurên Emîne Şenyaşar qetil kiribûn. Emîne Şenyaşar, ji bo girtin û darizandina faîlan û berdana kurê xwe Fadil Şenyaşar li pêşiya Edliyeya Rihayê çalakiya Nobeta Edaletê dabû destpêkirin. Şenyaşar, piştre jî çalakiya xwe veguhestibû pêşiya Wezareta Dadê ya li Enqereyê. Çalakiya Şenyaşar a li pêşiya Wezareta Dadê kete roja 120’an. Hevserokê Giştî yê Komeleya Mafên Mirovan (ÎHD) Huseyîn Kuçukbalaban û rêveberên şaxên ÎHD’ê yên Enqere, Amed, Antalya, Edene, Mêrsîn, Îzmîr, Stenbol, Wan, Agirî, Şirnex û Sêrtê jî tevlî bûn.
Hevserokê Giştî yê ÎHD’ê Huseyîn Kuçukbalaban di serdanê de axivî û got: “Faîl diyar in û em dibêjin ku daxwaza edaletê ya dayika Emîneyê, daxwaza me ye. Banga me li hikûmetê ew e ku tavilê dev ji van polîtîkayên necezakirinê berde.”
