Pîrozbahiyên bi wesîleya 4’ê Nîsanê rojbûna Rêber Apo li Bakur û Rojhilatê Sûriyeyê didomin.
Di pîrozbahiyên ku li bajarên Qamişlo, Til Hemîs û Til Temir ên kantona Cizîrê hatin lidarxistin de bal kişandin ser azadiyê. Di pîrozbahiyan de govend hat gerandin, şitil hatin çandin û pêşandanên cuda yên muzîk û folklorê hatin pêşkêşkirin.
QAMIŞLO
Pîrozbahî ji aliyê Meclîsa Malbatên Şehîdan a Qamişlo ve li Parka Azadiyê hat lidarxistin, bi dehan malbat û zarokên şehîdan hatin cem hev. Rêvebera Meclîsa Jinê ya Malbatên Şehîdan a Bakur û Rojhilatê Sûriyeyê Cewahir Osman di çalakiyê de axivî û diyar kir ku fikrên Rêber Apo meşaleya têkoşîna gelên bindest e. Piştî axaftinê bi stranên hunermend Danîş Botan govend hat gerandin û şahî bi coş dewam kir.
TIL HEMIS
Li Til Hemisê bi beşdariya rêxistinên sivîl, nûnerên partiyên siyasî û rûspiyên eşîrên Ereban li derdora goristanên şehîdan 50 şitil hatin çandin.
Nûnerê Kongra Star Îbtîsam Elî axaftinek kir û rojbûna Rêber Apo weke roja azadiya gelê Kurd pênase kir. Îbtîsam Elî destnîşan kir ku heta azadiya fîzîkî ya Rêber Apo pêk were wê têkoşîn bidome.
Şahî bi pêşandanên kevneşopî yên komên folklorê yên bi navê “Esala” û “Yekta Bihar” û stranên hunermend Tariq El Hisên bi dawî bû.
TIL TEMIR
Li Til Temirê bi hevdemî sê şahiyên cuda hatin lidarxistin. Destpêkê malbatên şehîdan li Parka Şehîd Sosin Bîrhat daxuyaniyek dan çapemeniyê û bang li saziyên navneteweyî kirin ku ji bo azadiya fîzîkî ya Rêber Apo zextê li dewleta Tirk a dagirker bikin. Piştî daxuyaniyê 150 şitil hatin çandin.
Pîrozbahî li Meydana Îstîqamê hat lidarxistin. Di pîrozbahiya ku gelek kes lê amade bûn de Hevserokê Komeleya Perwerdehiyê Xidir El Ilêwî axaftinek kir. Ilêwî diyar kir ku Rêber Apo sembola berxwedana li dijî dagirkeriyê ye.
Bername bi komên muzîkê yên “Çûkên Siberojê” û “Kulîlkên Kurdistan” derketin ser dikê berdewam kir. Pîrozbahî bi stranan û gerandina govendê bi dawî bû.
