Piştî nîqaşên berfireh ên derbarê dîrok, roja îro û siberoja civaka Êzidî û Şengalê de, Konferansa Ronakbirî ya Şengalê bi rojeva Banga Aşitî û Civaka Demokratîk-Pêngava Ji Rêber Apo re Azadî Ji Şengalê Re Xweserî bi dawî bû.
Gotara Banga Aştî û Civaka Demokratîk, ji aliye Hevseroka Meclîsa Xweseriya Demokratîk a Şengalê Nayîf Şemo ve hate xwendin. Di gotarê de hate destnîşan kirin ku Rêber Apo bang li civaka Êzidî û gelê Şengalê jî kiriye ku bi awayeke çalak beşdarî pêvajoya aşitî û civaka demokratîk bibin, di hemû qadên têkoşînê de cih bigirin. Her wiha bi vê bangê re anî ziman ku pêwîst e civaka Êzidî xweseriya demokratîk biparêze, xwe li ser esasê îradeya cewherî û nasnameya xwe ya resen rêvebibe û birêxistin bike.
Çend nirxandinên ji gotarê wiha ne;
WÊ PÊVAJO TESÎR LI SER IRAQ Û ŞENGALÊ JÎ BIKE
‘’Rêber Apo balê dikşîne ser xeteriyên li ser Şengalê û diyar dike ku pêwîst e xweseriya Şengalê ji her demê zêdetir îrade û parastina xwe ya cewherî xurt bike. Dîsa Rêber Apo destnîşan dike ku ji bo civaka Êzidî statuya xweser û demokratîk nebe nabe ye û bang dike ku ji vê mebdeyê gavek jî paşve neyê avêtin. Eger pêvajoya Aşitî û Civaka Demokratîk a Rêber Apo bi ser bikeve, ev pêvajo wê ji bo Şengalê û civaka Êzidî jî veguhere pêvajoya çareseriya demokratîk. Çareseriya pirsgirêka Kurd a li Tirkiyê wê li ser esasê çareseriya demokratîk rengê xwe bide Iraqê jî. Ji ber vê rastiyê, pêwîst e em bi her awayî beşdarê pêvajoya Rêber Apo bibin, ji bo destê Rêber Apo xurt bikin jî gavên sîyasî, dîplomatîk û civakî pêşbixin. Pêwîst e em baş zanibin ku, heya azadiya fîzîkî ya Rêber Apo û ewlehiya wî neyê mîsogerkirin em nikarin êrîşên qirkirinê rawestînin.’’
Di nav du rojên Konferansê de hebûna civaka Êzidî bi hemû aliyên xwe ve bû rojeva nîqaş û nirxandinên girîng. Ji rastiya dîrokî ya hebûna civaka Êzidî heya nasnameya çand û baweriyê, ji pêşxistina xebatên zanistên civakî heya statuya Şengalê gelek nêrîn, nirxandin û pêşniyar pêşketin. Dîsa ji bo xebatên dema pêş yên Akdemiya Zanistên Civakî ya Şengalê, pêşniyar û plansazî pêşketin. Konferans, bi vî awayî bû destpêkeke xurt ji bo pêşxistina xebatên ronakbiriyê.
Di dawiya konferansê de jî Endamê Akademiya Zanistên Civakî ya Şengalê Kendal Çiya axaftineke kurt kir. Kendal Çiya, li ser navê komîteya amadekar spasîya beşdaran, sazî û dezgehên ku tevlî amadekariya konferansê bûne kir.
Konferans bi dirûşmeya ‘Bijî Serok Apo’ û ‘Jin, jiyan, azadî’ bi dawî bû.
