Komîsyona Demokrasî, Xwişk-Biratî û Piştevaniya Mîllî ku ji bo çareseriya pirsgirêka Kurd li meclîsê ava bûye, civîna xwe ya 7’emîn lidar dixe. Serokên berê yên meclîsê beşdarî civîna komîsyonê bûn.
Serokê Meclîsê Nûman Kûrtûlmûş got, “Serokên me yên meclîsê yên ku tecrûbeya demokrasiyê ya Tirkiyeyê û meseleyên bingehîn ên Tirkiyeyê di tevahiya jiyana xwe ji nêz ve şopandine û ji bo çareseriyê hewl dane, ev vexwendina komîsyona me qebûlkirin, lewma spasiya wan dikim. 10 serokên me yên meclîsê wê îro li vê derê bi me re bin. 3 serokên me yên meclîsê yên hêja ji ber pirsgirêkên tenduristiyê me nekarî wan vexwînin vê civîna xwe. Di rûniştina destpêkê de em ê li 5 serokên xwe yên meclîsê guhdarî bikin. Li gorî tecrûbe, temen û demên xwe yên wezîfeyê em ê mafê axaftinê bidin wan. Eger di nava 20 deqeyan de karibin nêrînên xwe bi me re parve bikin, wê gelekî kêrhatî be. Di rûniştina piştî nîvro de em ê ji nêrînên 5 serokên xwe yên meclîsê sûdê werbigirin.”
