Bi sedan xelkê kantona Firatê û gundewarê wê, endamên saziyên sivîl û leşkerî, Hêzên Ewlekariya Hundirîn, Meclisa Kombûna Jinan a Zenûbiya, Partiya Yekitiya Demokratîk (PYD), Meclisa Jinan a Sûriyeyê, nûçegihanên li kantonê berê xwe da bin konê sersaxiyê yê şehîdê PAJKˊê şehîd Emîne Elî. Kon li pêş avahiya Meclisa Malbatên Şehîdan hat vedan.
Duh, HPGˊê bi daxuyaniyekê nasnameya şehîd Sara Dilsoz (Emîne Elî) a ku di 18ˊê Adara 2020ˊan de li Herêmên Parastinê yên Medyayê şehîd bûbû, ragihandibû.
Di merasîmê de li ser navê Kombûna Jinan a Zenûbiya endama Nivîsgeha Perwerdê Fatin Mihemed axivî û got: “Bi xemîngî, em Meclisa Kombûna Jinan a Zenûbiya sersaxiyê ji malbata şehîd Emîne Elî re dixwazin. Fedakariya şehîdan dîroka azadiyê dinivîse û ew hêzê dide me ku em rûbirûyî astengiyan bin û tîne bîra me ku azadiyê nayê dayîn, lê bi fedakariyan tê standin.”
Fatin di dawiya axaftina xwe de wiha got, “Em jinên ji vê civakê, soz didin şehîd ku rêya şoreşa ku di oxira wê de şehîd bûye bişopînin û bîranîna wê di wijdana me de nemir bimîne û bi peyama wê re dilsoz bin.”
Li aliyekî din jî, ji fermandarên Hêzên Sûriya Demokratîk (QSD) Salih El Hindawî axivî û diyar kir ku şehîd ew in ku destanên lehengiyê di her cih û demê de nivîsandine û şahdeta ku bi xwîna xwe ya paqij bi dest xistine wê di dîrokê de bîranînek nemir bimîne.
Endama Desteya Rêveber a Yekitiya Ragihandina Jin (YRA) Neda Mihemed jî wiha got, “Destpêkê em sersaxiyê ji malbata şehîd û tevahî dostên wê yên di eniyên şer û qada xebatê de piştgir dabûnê re, dixwazin. Şehîd Emîne bi rihê xwe yê coş di çiyayên bilind de têkoşiya, weke çawa çiya asîmanê hembêz dike ew jî azadiyê hembêz dike. Emîne red kir ku jiyaneke normal bijî û xwest bibe sembola azadî û finda ku rêya civaka xwe ronî dike.”
Hevseroka Desteya Perwerdê û Fêrkirinê ya kantona Reqayê Zelîxe Ebdî jî sersaxî da malbatên şehîdan û got “Şehîd namirin.”
Zelîxe da zanîn ku şehîd Emîne di warê ragihandinê de kar kiriye, lê piştî Şoreşa Rojava nas dike, biryarê dide ku tevlî têkoşîna çekdarî bibe û tevlî tevgera rizgariya Kurdistanê bû.
Zelîxe di dawiyê de got: “Em ji vê cihê pîroz, soz didin şehîd û tevahî şehîdên xwe ku peyam û têkoşîna we heta pêkanîna serkeftin, edalet, rizgarkirina xakê û avakirina Sûriyeyeke pirreng a demokratîk a nenavendî bidome.”
Di dawiyê de wesîqeya şehîd hat xwendin û radestî malbatê hat kirin.
