Li gorî Neteweyên Yekbûyî (NY) dibe ku li Gundê Terasinê 1000 kesî jiyana xwe ji dest dabe.
Rayedarên herêmî ragihandin ku heya niha cenazeyê 370 kesî hatiye peydakirin û veşartin, lê belê hê jî gelek kes winda ne. Ji ber ku xwegihandina herêma çiyayî ya Jebel Marra ku gundê berbehs jî li wê herême, zehmet e bîlanço jî nayê diyarkirin.
Li gorî dîmenên li cihê bûyerê, gundî û xebatkarên dilxwaz hewl didin di nava xirbe û heriyê de cesedên mayî derxînin. Di gel ku saziyên alîkariya navneteweyî negihîştine herêmê jî, xebatên lêgerîn û rizgarkirinê ji aliyê gundî, komîteyên xwecihî yên berxwedanê û Tevgera Artêşa Rizgariya Sûdanê (SKOH) ve tên birêvebirin.
Bobelat, li krîza mirovî ya ji ber şerê navxweyî ya di navbera artêş û Hêzên Piştgiriya Bilez ên paramîlîter de rû daye û ji Nîsana 2023’yan ve berdewam dike, zêde bû. NY, rewşa li Sûdanê weke ‘’xirabtirîn krîza mirovî ya li seranserê cîhanê’’ pênase dike; bi milyonan însan ji cih û warên xwe bûne û birçûbûn û nexweşiya kolerayê bi taybetî li herêma Darfurê li dijî jiyanê gefên mezin in.
