Bi hezaran kes ji kantona Firatê li Qada Jin a Azad a Kobanê li hev civiyan û bi wêneyên Rêber Apo, alên Kongra Star û bi dirûşmên ‘Bê Serok jiyan nabe’ û ‘Bijî Serok Apo’ meşiyan.
Meşê heta Qada Aştiyê dewam kir û veguherî mîtîngê. Piştî deqeyeke rêzgirtinê ya ji bo bîranîna şehîdan, endama Kongra Star a Kantona Firatê Xunav Xelîl axivî. Xunav Xelîl destnîşan kir ku Rêber Apo xeta wan a sor e.
Di daxuyaniyê de hate ragihandin ku yên dixwazin bi rengekî wekhev û aştiyane bijîn divê berê xwe bidin fikir û felsefeya Rêber Apo û hate gotin, “Rêber Apo bi fikrê xwe dîrok guhert û veguherande jiyaneke azad. Mînaka wê jî banga dîrokî ya 27’ê Sibatê ye. Ji wê rojê û heta roja me ya îro di nava Rojhilata Navîn de gelek guhertin pêk hatin. Divê êdî ew guhertin bibin zemînek û azadiya fîzîkî ya Rêber Apo misoger bibe. Ji ber ku Rêber Apo ji bo me xeta sor e.”
Hevseroka Encûmena Gelan a Kantona Firatê Roşîn Mehmûd jî diyar kir ku divê tecrîd tavilê bi dawî bibe û got, “Rêber Apo xwediyê fikrê neteweya demokratîk û gelan e. Di nava zagonên cîhanê de azadiya fikir û ramane heye, lê ev tenê li ser pelan e. Rêber Apo xwediyê fikirê demokratîk û aştiyane ye û ew aştiyê ji bo tevahî gelan dixwaze. Heta niha jî tecrîd li ser Rêberê me dewam dike. Ji 27’ê Sibatê ve banga Rêber Apo hat kirin, lê dewleta Tirk heta niha gav nehatiye avakirin. Berovajî wê ku hîn gefên xwe zêde kirine.”
Roşîn Mehmûd anî ziman ku divê êdî ew komisyonên ku hatine erkdarkirin demildest bi Rêber Apo re bicivin û ev yek anî ziman: “Divê êdî Rêber Apo ji zindanê derkeve. Heta niha jî cezayê disiplînê li ser Rêber Apo ye. Divê êdî derkeve û siyasetmedarên me yên din jî derkevin ji zindanê. Êdî em biratî û silameteiyê dixwazin, em li dijî xwînrijandinê ne. Dema ku dest bi vê şoreşê hat kirin, hewce bi şoreşa çekdarî hebû, da ku êdî em xwe isbat bikin, lê niha jî divê êdî bi rêya diplomasî em her tiştê xwe çareser bikin. Wê ev jî bibe zemînek ku li Rojhilata Navîn aştî pêk were.”
Hevserokê Desteya Kar û Barê Civakî ya Kantona Firatê Ehmed Xoce got ew ê azadiya fîzîkî ya Rêber Apo misoger bikin û got: “Pêngava Cîhanî ya di bin dirûşmeya ku ez jî dixwazim bi Rêber Apo re hevdîtinê bikim, em jî wê yekê êdî dixwazin. Lê dewleta Tirk heta niha gavên ku tê xwestin, neavêtiye. Êdî dewleta Tirk astengiyan pêk tîne û li hemberî vê pêvajoyê astengiyan derdixe. Mînaka wê jî heta niha Rêber Apo di bin tecrîdê de ye. Em êdî di demeke nêzîk de dixwazin ku azadiya fîzîkî a Rêber Apo misoger bibe û em wî di nava xwe de bibînin.”
