9’emîn Pêşangeha Pirtûkan a Navneteweyî ya Şehîd Herekol bi dirûşma “Pirtûk mifteya şaristaniyê ye” ku ji aliyê Desteya Çandê ya Rêveberiya Xweseriya Demokratîk a Herêma Bakur û Rojhilatê Sûriyeyê ve hatibû lidarxistin, bi dawî bû.
Pêşangeh li parka Azadî ya bajarê Qamişlo yê kantona Cizîrê hat lidarxistin. Hevserokên Meclisa Rêveber a Rêveberiya Xweser Evîn Siwêd û Husên Osman, dayika şehîd Herekol (Husên Şawîş) Xedîce El Mele, dayikên şehîdan, wêjevan, rewşenbîr, helbestvan, hunermend û desteyên çandê yên Bakur û Rojhilatê Sûriyeyê di dawîkirina pêşengehê de amade bûn.
Pêşangeh di 20’ê Cotmehê de bi 51 weşanxane, pirtûkxane û saziyên weşanê dest pê kir.
Di pêşangehê de nêzî 140 hezar pirtûk bi zimanên Kurdî, Erebî, Tirkî, Suryanî, Ermenî, Îngilîzî û Rûsî hatin pêşkêşkirin û tê de rêjeya beşdariya jinan ji sedî 40 bû. Rêjeya pirtûkên Kurdî ji sedî 43 û ya pirtûkên zarokan jî ji sedî 4 bû.
Di serî de dayika şehîd Herekol Xedîce El Mele kêfxweşiya xwe anî ziman û bixêrhatina mêvanan kir.
Hevserokê Meclisa Rêveber a Rêveberiya Xweser Husên Osman jî xêrhatina wêjevan û rewşenbîran kir û got ku çalakiyên wiha dikarin pirên têkiliyê di navbera afirîneran û civakê de ava bikin û fikrên azad xurt dikin û got: “Çand ruhê şoreşê ye, şoreş jî ne tenê ya Siyasî û Leşkerî ye. Şoreşa me, şoreşa çandî ya avakirina mirovê azad e.”
Di merasîmê de Koma Ecawîd a folklora Reqayê û Koma Desteya Çandê ya Bakur û Rojhilatê Sûriyeyê berhemên xwe yên hunerî pêşkêş kirin.
Piştre nivîskarên beşdar Ferîd Cizîrî, Îsmet Hesen, Anahîta Sîno, Ehmed Husênî, Husên El Omerî û Husên Elî, her wiha hemû weşanxane, pitrûkxane û saziyên weşanê yên beşdar hatin xelatkirin.
Di dawiya merasîmê de hemû beşdar jî hatin xelatkirin.
