Hevseroka Partiya Jiyana Azad a Kurdistanê (PJAK) Peyman Viyan, fermandara pêşeng Feraşîn Bêrîtan ku di encama êrîşa dewleta Tirk a 14’ê Kanûna 2023’yan de şehîd bû, bibîr anî û diyar kir ku dê teqez armanca wan pêk bînin.
Peyman Viyan, di serî de di şexsê hevrê Feraşîn Bêrîtan de em hemû şehîdên azadiyê bibîr anî û got, “Bi taybetî em hevrêyên ku ji heman herêmê tevlî nava Tevgera Azadiyê bûne û canê xwe feda kirine, bibîr tînin. Hevrê Feraşîn jî di şopê van hevalan de beşdarî nava Tevgera Azadiyê bû û heta dawiyê erka xwe ya şoreşgerî bi şêwazek herî baş pêk anî.
‘ŞEHADETA HEVRÊ FERAŞÎN WINDAHIYEK GIRAN BÛ’
Şehadeta hevrê Feraşîn ji bo me weke Tevgera Azadî ya Rojhilat windahiyeke giran bû. Ji ber ku hevrê Feraşîn hem di asta şoreşgerî de û hem jî di asta rêveberiyê de pêşengiya her kar û xebatî dikir. Bi îdîayê ku şoreş bi ser bixe li her derê têkoşîn dikir. Ji ber vê yekê şehadeta hevrê Feraşîn ji bo Tevgera me windahiyeke giran bû. Lê em dizanin bi dehan heta bi sedan keç û xurt bi taybetî yên Rojhilatê Kurdistanê, dê têkoşîna hevrê Feraşîn bidomînin.”
Viyan Peyman, anî ziman ku şehîd Feraşîn tevlîbûneke bi zanabûn ji bo Tevgera Azadiyê pêk aniye û wiha domand, “Dema ku me hev nas kir, hê 3 meh li ser tevlîbûna wê ya nava Tevgerê bihurî bû. Me bihîstibû ku hevrêyek ciwan ji bajarê Selmasê beşdar bûye, me bi xwe jî meraq dikir ku bibînin. Hevrê Feraşîn ji ber tevlîbûna xwe, gelek kelecanî û bi coş bû. Aliyê wê yê manewî û îdîaya wê xurt bûn. Ev yek di kaseyat û helwesta hevrê Feraşîn de xwe dida der.”
DI NAVA ÇANDA BERXWEDANÊ DE MEZIN BÛ
Viyan Peyman, da zanîn ku şehîd Feraşîn di nava hewirdorek welatparêz ku bi çanda berxwedanê tê nasîn mezin bûye û wiha dewam kir, “ Her tim li dijî êrîş û dagirkeriya hêzên derve, serî hildan e û di parastina çanda xwe de helwestek xurt raber kirine. Beriya Tevgera Azadiyê jî ev herêm xwe ji gelek êrîşan parastiye. Cihê hevrê Feraşîn lê mezin bûye, xwedî çanda jinên serhildêr, jinên ku li dijî pergala mêrsalarî û dagirkerî têkoşîn didin meşandin e. Ew jî li nava hewirdor û çandeke bi vî rengî de mezin bû. Gelek caran ew bi xwe jî behs dikir, berxwedana Kelha Dimdimê ku weke çanda berxwedanê derketiye pêş, li hemberî Şah Ebas ê wê demê bi mehan berxwedanî hatî kirin. Di vê berxwedanê de jin ji bo ku nekevin destê dijmin, xwe bi keziyên xwe daliqandin ango di zinaran de xwe avêtine.”
Viyan Peyman diyar kir ku şehîd Feraşîn li ser vê dîrokê lêkolînên xurt dikir û pê de çû, “Ev çanda berxwedanê ya li herêmê bandorek mezin li ser kesayet û taybetmendiya hevrê Feraşîn kiribû. Gelek hevrêyên ku ji wê herêmê beşdarî Tevgera Apoyî bûne, wek mînak hevrê Aryen Arî jî bi vê çandê mezin bibû û tevlî bibû. Ew jî hevrêyek me yê pêşeng û fermandarê HPJ’ê bû û li her deverê Rojhilatê Kurdistanê têkoşînek mezin da meşandin. Her wiha hevrê Mûsa ku di berxwedana li Kobanê de şehîd bû, ew jî ji vê herêmê tevlî bibû û bi kesayeta xwe ya fedaî û şoreşgerî derket pêş. Hevrê Feraşîn jî ku bi salan di nava xebatên ciwanan de li Rojhilat xebat meşand hebû, 12 sal berê şehîd bû. Bi saya beşdarbûna van hevrêyan, gelê herêmê ji nêz ve Tevgera Apoyî nas kir, ruhê wê ya welatparêzî bi çanda Kurdbûnê re hê xurtir bû.
Hevrê Feraşîn dixwest vê çandê di nava Tevgera Apoyî de zindî bike û vê têkoşînê li Rojhilatê Kurdistanê bixe malê hemû jin, ciwan û civakê. Dixwest ev fikir û felsefê bike malê her kesê. Ji ber vê her tim di nava hewldana xwe pêş xistinê de bû. Hevrê Feraşîn digot, ‘Jineke ku ji Rojhilatê Kurdistanê beşdarî nava Tevgera Apoyî bûye û pêşengiyê dike, divê xwe bîne wê astê ku xwe di fikr û felsefeya Rêber Apo û xeta azadiya jinê de kur bike û bibe mînak ji bo tevlîbûna ciwanên Rojhilatê Kurdistanê. Bi berdewam daxwaza wê ya pêşketin hebû. Di demeke kurt de xwe pêş xist û karî di asta rêvebertî de peywir bigire.”
‘GIRÎNGIYEK MEZIN DIDA PERWERDEHIYÊ’
Viyan Peyman destnîşan kir ku rola şehîd Feraşîn di avakirin û xurtkirina HPJ’ê de pir mezin e û wiha got, “Li seranserê Îranê em çawa dikarin artêşa jin mezin bikin ku jin bibe xwedî îrade, hebûn û parastin, li ser van mijaran gelek lêhûrbûn dikir û li gorî wê plan û proje pêş dixist. Ji ber vê ger îro HPJ’ê di vê astê de li Rojhilatê Kurdistanê weke hêzeke parastina jin esas tê girtin, ev yek bi saya hevrê Feraşîn e.
Divê kesayeta hevrê Feraşîn li Rojhilatê Kurdistanê baş were naskirin. Ji ber ku xwedî îdîa û israrek mezin a guhertinê bû, rojane bi xwe re guhertinên nû di şêwaza xwe ya têkoşînê de çêdikir. Jinek azad dikare li her derê civakek azad ava bike. Hevrê Feraşîn bi vê yekê bawer dikir û dixwest ji derdora xwe dest pê bike. Weke fermandarek jin jî dixwest fikra li hemberî artêşbûna jin a hişk jî biguherîne. Hewl dida hest, ruh û hunera jin nîşan bide. Bi hevrêyên ku nû ji Rojhilatê Kurdistanê beşdar dibûn re, gelek mijûl dibû. Kedek mezin ji bo pêş xistina wan, raber dikir.
Dixwest her tim hevrêtiya rast li ser bingeha azadiyê di navbera jin û mêr de pêş bixe. Hevrêtiya wê ya bi hevalên mêr re li ser esasê guhertin û veguhertina zîhniyetê bû. Weke gerîla dixwest li ser xeta azadiyê hevrêtî bike û bibe mînak. Heval Feraşîn pir girîngî dida perwerdeyê. Jineke jixwe bawer bû. Gumanên wê ji bo têkoşînê çênedibûn. Bi domdarî li ser perwerdeya xwe û perwerdeya derdora xwe disekinî. Ev dihişt ku rola pêşengtiyê ya heval Feraşîn diyar be. Li ku derê têkoşîn meşandiba, hebûna wê li wir diyar dibû. Pir caran di hinek xebatên hevbeş de, mirov pir dixwest pê re kar bike. Ev xal girîng e ku em çawa dikarin têkoşîna heval Feraşîn li Rojhilatê Kurdistanê mezin bikin.
Li ser xetê bi dehan şehîdên fermandar hatine dayîn. Bi taybetî heval Aryen Arê ku ji Maku heya Şaho têkoşîn meşandiye. Her du hevalan bi hev re gelek caran têkoşîn meşandiye. Ji bo ku artêşa HPJ’ê mezin bibe, heval Feraşîn, heval Aryen, heval Rojda Kotol ku ev her sê heval jî fermandarên HPJ’ê bûn, bi salan bi hev re kar kirin û têkoşîn meşandin. Şehadeta her sê hevalan jî ji bo Rojhilat giran bû. 21 sal in em weke PJAK’ê li Rojhilatê Kurdistanê têdikoşin.”
‘EM PARTIYA ŞEHÎDAN E’
Viyan Peyman, axaftina xwe bi van gotinan bi dawî kir, “Em Partiya Şehîdan e, li ser xeta şehîdan têkoşîna me li Rojhilatê Kurdistanê mezin bûye. Li ser xeta Zîlan Pepûle, Şirîn Elemhûlî û li ser xeta Aryen û Feraşînan roja îro li Rojhilatê Kurdistanê felsefeya Jin, Jiyan, Azadî belav dibe. Îro em bi hêzeke mezin têdikoşin. Em ji bo giştî gelên Îranê dibin nimûne û sembol. Di şexsê heval Feraşîn de em ê hewl bidin li Rojhilatê Kurdistanê û Îranê têkoşînê hîn mezintir bikin. Ji bo ku ruhê heval Feraşîn li her derê were jiyîn, em ê têkoşîneke bêhempa bidin meşandin.
Em berpirsyarên şehîdên xwe ne. Divê em keda van hevalan li Rojhilatê Kurdistanê bi azadiyê mîsoger bikin. Xeyala van hevalan, bi taybetî jî xeyala heval Feraşîn ew bû ku li Îranê artêşa jin, hêza jin mezin bibe. Heval Feraşîn ji bo ku civaka Kurd ji qirkirinê rizgar bibe, têkoşîn meşand. Tevgera Azadî bi her şehadetekê mezintir bûye. Em li ser esasê serketinê, li Rojhilatê Kurdistanê têkoşînê hîn mezintir bikin. Divê ciwan çeka heval Feraşîn rabikin û vê têkoşînê mezin bikin. Em ê jî li ser vê esasê têkoşîna xwe hîn mezintir û berfirehtir bikin.”
