Partiya Demokrasî û Wekheviyê ya Gelan (DEM Partî) di 6-7’ê Kanûnê de li Navenda Çandê ya Cem Karaca ya Bakirkoy a Stenbolê “Konferansa Aştî û Civaka Demokratîk a Navneteweyî” lidar xist. Gelek rewşenbîrên xwecihî-biyanî, akademîsyen, hiqûqnas, rojnamevan û xwediyên Xelata Nobelê weke qiseker beşdarî konferansê bûn. Nûnerên partiyên siyasî, nivîskar û nûnerên rêxistinên civakî yên sivîl jî li konferansê amade bûn.
Ya ku mohra xwe li konferansê xist jî peyama Rêber Apo bû ku ji Girtîgeha bi Ewlekariya Bilind a Tîpa F a Îmraliyê şand. Peyama Rêber Apo ya li ser aştî û çareseriya demokratîk li salonê deng veda.
‘ABDULLAH OCALAN FÎLOZOFEKÎ DÎROKÎ YE’
Profesorê Dîroka Hemdem û Nûjen Dr. Mûhammed Rifaat el Îmam ku ji Misrê tevlî konferansê bû, ji ANF’ê re axivî û Rêber Apo weke fîlozofekî pênase kir ku bi wêrekiya lîderên rê li ber veguherînên civakî dixe, tevdigere.
El Îmam diyar kir ku di serî de neteweya demokratîk pênaseyên ji aliyê Rêber Apo ve têne kirin di asta gerdûnî de ne û dikare ji bo hemû gelan, ji bo hemû dewletan bi cih bê anîn; ji ber ku di cewhera van têgehan de hurmeta li mirov, nasname û çandan heye, înkar û îmhayê red dike.
El Îmam destnîşan kir ku ji ber vê yekê her kesên dilxwazê aştiyê di van fikir û pîvanan de gihîştine hev û anî ziman ku di konferansê de rakirina tecrîda li ser Rêber Apo mijara sereke bû, lewma ev yek wê bibe piştgiriyeke girîng li nêzîkatiya aştiyê.
Di konferansê de li ser Sûriyeyê jî gelek peyam hatin dayin. Gelek beşdaran diyar kirin ku rêya çareserkirina şerê mezhebî û entîkî yê li Sûriyeyê bi leşkerî yan jî dervehiştinê nabe, çareserî divê siyasî be û xwe bispêre lihevkirinê. Di vê çarçoveyê de işaret bi girîngiya dewleteke demokratîk û nenavendî hate kirin.
Qisekeran anîn ziman ku ev model bi rêveberiya xweser a li Bakur û Rojhilatê Sûriyeyê (Rojava) di asteke girîng de bi cih hatiye anîn, ku sûdê ji felsefeya Rêber Apo werdigire.
Beşdaran bi bîr xistin ku nenavendîbûn û demokrasî ku pîvanên bingehîn ên felsefeya Rêber Apo ne, dikare ji gelek krîzên li welatên Rojhilata Navîn re çareseriyê peyda bikin ku ev welat ji gelek pêkhateyan pêk tên.
XETERIYA HERÎ MEZIN…
Dr. Mîrzad Hacim ku li qada têkiliyên navneteweyî akademîsyen e, diyar kir ku dema veguhêz a heyî ya li Sûriyeyê ji aliyê kapasîteya rêvebirina cihêrengiyên civakî di ezmûneke rasteqîn re derbas dibe. Dr. Hacim destnîşan kir ku rêveberiya heyî di vê mijarê de kêm maye, mînakên dawî yên vê yekê jî êrişên li herêma peravê û liv û tevgera li Siwêdayê ye.
Hacim ragihand ku xeteriya herî mezin “Gotinên şoven-neteweperest ên li dijî Kurdan e” ku zêde bûne û got, “Ev gotin ji aliyê rêveberiya navendî ya ku hewl dide xwe jinûve serdest bike, weke amûreke populîst a erzan tê bikaranîn. Li gel vê yekê dervehiştina siyasî jî dewam dike. Meclîsa Gel a heyî û pêkhateyên hikumetê bi ti awayî cihêrengiya dewlemend a Sûriyeyê nîşan nadin.”
Hacim diyar kir ku ev yek veguheriye “Kabîneyeke alîgir”, weke dubareya dema Esad e û destnîşan kir ku li Sûriyeyê pêwîstî bi lihevkirineke civakî ya nû heye.
