Di Roja Mafên Mirovan a Cîhanê de, Rêxistina Mafên Mirovan a Sûriyeyê, Rêxistina Mafên Mirovan a Efrîn-Sûriyeyê û Rêxistina Mafên Mirovan a Firatê li pêşiya navenda Neteweyên Yekbûyî (NY) a li Qamişloyê çalakiyeke protestoyê bi dirûşma “Ji bingehên jiyana rojane ber bi çareseriyên biedalet ve: parastina mafên mirovan rêya ewle ya pêşeroja Sûriyeyê ye” lidar xist.
Di çalakiyê de nûnerên rêxistinên sivîl û çalakvanên hiqûqî amade bûn û banga misogerkirina vegera ewle ya koçberan û hesabxwestina ji sûcdarên şer û aşkerakirina aqûbeta windahî û revandiyan kir.
Rêvebera Rêxistina Mafên Mirovan a Sûriyeyê Evîn Cûma daxuyanî xwend û got, pabendiya bi mafên mirovan erkeke rojane ye. Di daxuyaniyê de îşaret bi zehmetiyên ku gelê Sûriyeyê kişandine hate kirin ku di encamê de armanc ew bû ku hevgirtina civakî were têkbirin.
Di daxuyaniyê de hat diyarkirin ku domandina bikaranîna zimanê kînê û provakasyonê hişt ku komkujî li dijî sivîlan li gelek deverên wekî perav, Siwêda, Hums û Bakur û Rojhilatê Sûriyeyê werin pêkanîn.
Di berdewama daxuyaniyê de hat gotin ku bikaranîna vî zimanî gefê li yekparçebûna Sûriyeyê dixwe, nexasim ku metirsiya vegera DAÎŞ’ê hîna heye.
Di dawiya daxuyaniyê de banga pêşxistina çanda diyalogê û aştiyê ji bo pêşîgirtina li şerekî navxweyî, her wiha banga pêkanîna yekitiyê ji bo pêşîgirtina li vegera DAÎŞ’ê hat kirin û ev daxwaz hatin kirin:
“ – Destpêkirina pêvajoya rastîn a aştiyê.
– Hesabxwestina ji hemû sûcdarên şer û yên sûcên dermirovî.
– Misogerkirina mafê vegera ewle ya bi garantiya navneteweyî ya koçberan.
– Aşkerakirina aqûbeta windahiyan û berdana girtî û revandiyan.
– Xurtkirina garantiyên destûrî yên ji bo parastina pirrengiyê û mafên jin, zarok û koçberan.
– Misogerkirina beşdariya jinan di hemû astên pêvajoya siyasî û cihên biryarê de.
– Sazkirina destûreke nû li gorî hêvî û armancên gelê Sûriyeyê ku tê de desthilat jihevveqetî bin û rêz ji mafên sereke re were girtin.”
