Şêniyên bajarê Kobanê ji bo pêşwazîkirina gelê Bakurê Kurdistanê yên li navçeya Pirsûsê ya Rihayê kombûne berê xwe dan sînor. Şêniyên ku li ser sînor axivîn, diyar kirin ku divê îro tevahî Kurd dest bide destê hev û banga xwedîderketinê kirin.
XWEDÎ LI KOBANÊ DERKEVIN
Endama Ofîsa Jin a TEV-DEM’ê Bêrîvan Cuma, diyar kir ku ew ji bo pêşwazîkirina gelê Bakurê Kurdistanê hatine ber sînor û got, “Em bangawaziya her çar parçeyê Kurdistanê dikin. Gelê Kobanê bi qirkirinê re rû bi rû ye. Ew çeteyên hov dixwazin Kobanê dagir bikin. Em jî bang li herkesî dikin. Em dibêjin, xwedî li Kobanê derkevin. Em niha li benda gelê me yê Bakurê Kurdistanê ne. Seferberiya giştî hate îlan kirin. Li ser vê esasê em li ser sînorê Kobanê ne. Em dixwazin pêşwaziya wan bikin. Bila ew jî derbasî vî alî bibin. Ji ber em her çar parçe bûne yek. Em bang li saziyên mafên mirovan dikin ku bila xwedî li vê dozê derkevin. Ji ber ku gel di bin xetereya qirkirinê de ye. Warên me tê talan kirin. Em dîsa dibêjin berxwedan jiyane û em ê heta dilopa xwîna xwe ya dawî li ber xwe bidin û em ê têkoşîn bikin.”
DIVÊ HER KES BERÊ XWE BIDE KOBANÊ
Şêniyê bi navê Xemgîn Hecarî, jî da zanîn ku ew tevî şert û mercên dijwar ên sermê û berfê ew ji bo pêşwazîkirina gelê Bakurê Kurdistanê berê xwe dane sînor û got, “Kobanê berdêlek mezin da. Kurd îro nebin yek, wê kengê bibin yek? Êrîşa li ser Kobanê nayê qebûlkirin. Îro ji her çar alî ve Kobanê hatiye dorpêçkirin. Ji ber dorpêça ku bi rojan e didome şîrê zarokan, xwarin, av û ceyran tune ye. Her tişt qutkirin. Hêviya me ji gelê me heye. Divê îro Kurd destê xwe bidin hev. Sedî yek tenê jî xwîna wî/ê germ be, kes nikare tiştek li me bike. Em îro hêviya gelê xwe ne. Eger Kobanê bi tenê bimîne wê rastî qirkirinê were û ji birçiyan bimirin. Kobanê di bin dorpêçê de ye. Divê her kes berê xwe bide vir.”
