Berxwedana şervanên YPG-YPJ’ê li dijî êrîşên dewleta dagirker a Tirk û çeteyên HTŞ-DAÎŞ’ê yên li ser Rojava berdewam dike. Şervanên YPG-YPJ’ê yên li eniya şer in diyar kirin ku dewleta Tirk û çete dixwazin bi êrîşa li ser Şoreşa Rojava li dijî gelê Kurd qirkirinê bikin.
Şervanên YPJ’ê ku di tunelên berxwedanê de li dijî çeteyên barbar ên ku porê şervanên jin ên Kurd dibirin, destdirêjiyê dikin û her cûre hovîtiyê dikirin şer dikin, anîn ziman ku çi dibe bila bibe ew ê dev ji axa xwe bernedin. Şervanên YPJ’ê diyar kirin ku gelê Kurd jî piştgiriyê dide berxwedanê û têkoşîna xwe ya li dijî çeteyan bi van gotinan vegotin:
“Berî her tiştî, em silavên xwe ji hevalên xwe yên li eniya şer û ji gelên Kurdistanê yên li her çar parçeyan re dişînin.
Wekî hêzên YPJ’ê, em îro di tunelên xwe de ne. Wek şervanên jin, çi dibe bila bibe em ê dev axa xwe bernedin û gelê me piştgiriyê dide me. Dijmin dixwaze şoreşa me ya jinan ku me bi salan bi zehmetî û hewildanek mezin parastiye, bi tevahî ji holê rake. Ji bo vê yekê, ew serî li her cûre hovîtiyê didin, porê jinan dibirin. Ew êdî nikarin me jinan di nav çar dîwaran de bigirin; em êdî bihêz, bi biryar û berxwedêr in. Ez bang li hemû gelên Kurdistanê dikim; beşdarî seferberiya ku ji bo Rojava hatiye destpêkirin bibin.
Wekî YPJ’ê em li Kobanê ne. Kobanê û Rojava di bin dorpêça dijmin de ye. Lê divê dijmin bizanibe ku ew çiqas dorpêç bikin jî, wê nikaribin Kurdan têk bibin. Heta ku Kurdek tenê jî bimîne jî em ê dîsa li ser axa xwe bijîn. Em ê tu carî dev ji axa xwe bernedin. Dibe ku ew hin deveran dagir bikin û desteser bikin, lê em ê dev ji axa xwe, welatê xwe bernedin. Îro roja Kurdan e. Her hevalekî me beşdarî berxwedanê dibe, şer dike. Tevî hemû êrîşan, dijmin nikare îradeya me bişkîne. Ew propagandayê dikin, dibêjin ‘me ev der girtiye, me ew der girtiye’, lê ne wisa ye.
Bila ew vê yekê bizanibin; em niha li Kobanê ne, dibe ku em di bin dorpêçê de bin, lê em ê tu carî li ber kesî serî netewînin, nemaze jin. Gelê me li her çar perçeyên Kurdistanê rewşa Rojava dibîne, ji ber vê yekê divê her kes berê xwe bide Rojava û piştgiriyê bide gelê xwe. Em Kurd in û heke em hev neparêzin, kes me naparêze.”
‘DIJMIN HER KU ÊRÎŞ DIKE DERBÊN GIRANTIR DIXWE’
Şervanê YPG’ê Tolhildan Qamişlo tevî ku di encama êrîşên dewleta Tirk û çeteyên HTŞ-DAÎŞ’ê de birîndar bûye jî, berxwedana xwe didomîne, diyar kir ku Kobanê di bin êrîşeke mezin de ye. Tolhildan Qamîşloanî ziman ku ew bersivê didin êrîşên çeteyan û wiha domand:
“Em niha li Qereqozaqê ne. Me bersiva êrîşa çeteyan da; ew neçar man ku paşve vekişin, miriyên xwe li dû xwe hiştin û reviyan. Piştî vekişînê, wan dîsa bi çekên giran û droneyan dest bi êrîşê kirin, lê dîsa jî nekarîn bigihêjin armancên xwe. Piştre bi 4 wesayîtên zirxî êrîş kirin û me jî bi çekên ku me hebûn bersiv da, wan neçar kir ku dîsa paşve vekişin. Di êrîşa dawî de hewl dan ku nêzîkî me bibin û me bi teqandina mayînan bersiv da. Em birîndar bûn û negihîştin dermankirina cidî; me tenê birînên xwe pêçan, lê tevî her tiştî, em berxwedana xwe didomînin û em ê bidomînin.
Moralê hevalên me bilind e. Rast e dijmin êrîş dike, lê ew bi wesayîtan êrîş dikin. Ew ne di rewşeka ku karibin sîng bi sîng şer bikin. Ew tenê bi çekên giran êrîş dikin, ew nikarin pêşve biçin ûcihekî ku ew karibin birevin tuneye. Her cara ku ew êrîşî me dikin, em derbên giran li wan dixin. Bi sedan miriyên wan hene. Li erdê ne û nikarin cenazeyên xwe jî bistînin. Gelê me jî berxwedaneke mezin raber dike, berxwedana wan silav dikim. Di dawiyê de ez dixwazim vê bibêjim; ciwanên Kurd li her çar parçeyên Kurdistanê û derveyî welêt, werin û tevlî vê seferberiyê bibin. Em ê bi ser bikevin, gelê Kurd wê bi ser bikeve. Bila gelê me bizanibe ku ev şer şerê man û nemanê ye. Divê em di vî şerî de xwe îspat bikin. Divê hemû ciwanên li Bakur, Başûr, Rojhilat û Rojava tevlî vê seferberiyê bibin. Wekî min got, ev şerê man û nemanê ye.”
