Parlamenterên Swêdî yên ji partiyên cuda, Kadir Kasirga, Lawen Redar, Markus Wiechel û Bjorn Soder, derbarê komkujî û êrîşên dawî yên li Sûriye û Rojava de pêşniyazpirs ji bo bersivandinê pêşkêşî parlementoyê kiribûn. Wezîra Karûbarên Derve ya Swêdê Maria Malmer Stenergard, di rûniştineke giştî ya roja Pêncşemê de bersiva van pirsan da.
Parlamenteran di pêşniyazpirsên xwe de bal kişandin ser rewşa Kurdan, kêmneteweyên olî û Durzî ên li hemberî êrîşên HTŞ’ê.
Maria Malmer Stenergard, diyar kir ku tundiya li Sûriyeyê ya li dijî sivîlan nayê qebûlkirin. Wê li ser civînên ku di navbera hikûmeta veguhêz û Rêveberiya Xweser a Bakur û Rojhilatê Sûriyeyê de di 18 û 20’ê Çileyê de hatine lidar xistin, erênî nirxand. Maria Malmer Stenergard bang li her du aliyan kir ku girêdayî peymana agirbestê û peymana ku di 10’ê Adara 2025’an de hatiye îmzekirin bibin.
Maria Malmer Stenergard, da zanîn ku Swêd ji bo her kesî, bêyî ku cudahî li ser girêdana etnîkî an olî çêbike, ji bo Sûriyeyek ewle û hemû alîgir parêzvaniyê dike.
Her wiha Maria Malmer Stenergard, anî ziman ku ji bo hesab ji berpirsyarên ku sûc kirine û hê dewam dikin bê pirsîn xebatê dimeşînin û got ku ew di vê çarçoveyê de bi rêkûpêk bi nûnerên komên etnîkî û olî re dicivin.
