Daxuyaniya vê hefteyê ji aliyê Îkbal Eren a xwişka Hayrettîn Eren ê ku di bin çavan de hate windakirin ve hate xwendin.
Di daxuyaniyê de hate diyarkirin ku bi salan binçavkirina Ayşenûr Şîmşekê hatiye înkarkirin û fail jî bi rêya polîtîkaya bêcezahiştinê hatine parastin.
Hate bibîrxistin ku Ayşenûr Şîmşek a dermansaz a 27 salî ji bo ku di nava birêxistinbûna xebatên kedkarên tenduristiyê de cih girtiye, hatiye binçavkirin, êşkenceyên giran lê hatine kirin û piştî 24’ê Çileya 1955’an bi tu awayî agahî jê nehatiye wergirtin. Hate îfadekirin ku li gorî raporên otopsiyê êşkenceyeke giran li Ayşenûr Şîmşekê hatiye kirin, bi çekekê ji nêz ve hatiye qetilkirin, nasnameya wê hatiye veşartin û cenazayê wê li Goristana Bêkesan a Kirikkaleyê hatiye veşartin.
Di daxuyaniyê de hate diyarkirin ku tevî 31 sal derbas bûne jî têkildarî dosyayê lêpirsîneke bibandor û serbixwe nehatiye kirin û banga rakirina biryara neşopandinê û jinûvevekirina dosyayê hate kirin.
Fatma Şîmşek a xwişka Ayşenûr Şîmşekê jî anî ziman ku fail tên zanîn lê belê nayên darizandin û got ku ew ê têkoşîna têkildarî kesên di bin çavan de hatine windakirin û înfazên bêdaraz bidomînin.
