Li Silêmaniyê îro jî bi tevlîbûna hunermend, çalakvan, nivîskar, mamosteyên olî û girseyek zêde ya ji jin, ciwan û xwendekar meşek girseyî ya ji bo piştgiriya Rojavayê Kurdistanê hate lidarxistin.
Di çalakiyê de Orkestraya Newa gelek stran û sirûdên netewî pêşkêş kir.
Hunermend Belên Faris di çalakiyê de axivî û got: “Çand nasnameya me ye, niha çeteyên Şera û dewleta Tirk dixwaze nasnameya me tine bike. Ji bo wê em Orkestra Newa cihê xwe di çalakiyê de girt. Me careke din piştrast kir ku em li gel xwişk û birayên xwe yên Rojava ne.”
Hunermend Mîr Ekber jî axivî û got: “Îro bi deng û sirûdan tevlî çalakiyê bûn. Ji ber ku Rojava dayîka Kurdane. Dilê me li gel wane. Yekane daxwaza me bicihanîna mafê rewa ya gelê Kurde.”
Di dema xwepêşandanê de ala Herêma Kurdistanê, şervanan û dirûşmên ‘Bijî Berxwedana Rojava’, ‘Gelê Kurd Yeke’ û ‘Jin, Jiyan, Azadî’ qîr kirin. Her wiha pankart û wêneyên keziyan hatin hildan.
RANYA
Îro li bajarokê Serûçawa yê girêdayî navçeya Ranye ya ser bi Îdareya Serbixwe ya Raperîn li dijî êrişên çeteyên DAIŞ-HTŞ û çeteyên dewleta Tirk a dagirker li ser Rojavayê Kurdistanê û gelê wê meşeke girseyî lidarxistin. Di meşa ku bi sedana ciwan, jin mêr tevlî bûn de, dirûşmeyên ‘Kurdistan Yeke’, ‘Bijî Berxwedana Rojava’ hatin berzkirin û bêdengiya navnetewî a li dijî erişên çeteyan bi tundî hat şermezarkirin.
Xelkî deverê di meşê de dan zanîn ku gelê Kurd sînorên di dest hatî kişandin yên nikarin îradeya gelê Kurd parçe bikin, Kurd yekin. Her wiha gotin, “Berxwedana Rojava, berxwedana hemû gelê Kurde. Lewra li ser her Kurdekê ferze ku li dijî van êrişên hovane, egera komkujiya gelê Kurd rabe ser piyan û ji bo piştgiriya berxwedana Rojavayê Kurdistanê çi ji destê wan tê bikin.” Xelkê Dihokê bi armanca piştgirîkirina berxwedana Rojavayê Kurdistanê meşeke girseyî lidar xist. Di meşa ku li navenda bajar hate destpêkirin de, hate xwestin ku dorpêça li ser Rojavayê Kurdistanê demildest were rakirin.
DIHOK
Li navenda bajarê Dihokê, xelkê Dihokê îro jî ji bo piştgiriya berxwedana Rojavayê Kurdistanê û şermezarkirina êrişên bi armanca qirkirina gelê Kurd yên ji aliyê çeteyên DAIŞ-HTŞ û çeteyên girêdayî dewleta Tirk a dagirker tên kirin de, daket kolanan û meşeke girseyî lidar xist. Xelkê Dihokê bang li her Kurd û dostên wê kir ku ji bo rakirina dorpêça li ser Kobanê û êrişên li ser tevayî Rojavayê Kurdistanê rabin ser piyan û tişta ji destê wan tê bikin.
Beşdarên meşê dirûşmeyên neteweyî berz kirin û tekez kirin ku erkê her Kurdekî ye ku di vê qonaxê de piştgiriyê bide destkeftiyên Rêveberiya Xweser. Her wiha wan bang li civaka navnetewî kirin ku zextê li dewleta Tirk a dagirker bikin da ku êrişên xwe yên li ser sivîlan rawestîne.
Di meşê de peyama “Heta ku xwişk û birayên me di bin gefên çeteyan de bin, emê li kolanan bin. Ji ber ku parastina Rojava tê wateya parastina rûmeta hemû gelê Kurd li her çar parçeyên Kurdistanê.”
Parêzgeha Duhokê ji ber nêzîkbûna xwe ya erdnîgarî bi Rojavayê Kurdistanê re her tim bûye navenda piştgiriya gelê Rojava. Heta niha jî, welatiyên bajêr dixwazin bi çalakiyên cûr bi cûr piştgiriya xwe ji bo Rojava nîşan bidin.
