Dema ku êrîşên çeteyên dewleta Tirk, HTŞ û DAÎŞ’ê yên li ser Rojava dewam dikin, gelê Rojava ku li dijî êrîşan berxwedaneke dîrokî didin, bi ruhê seferberiyê çek radikin. Gelê Dêrikê ragihandin ku ew li dijî êrîşan Tabura Gel a Dêrikê ava kirine.
Şervanê YPG’ê Seydo Dêrik di merasîma ragihandina Tabura Gel de axivî û wiha got:
“Ez di destpêkê de, di serî de YPG û YPJ’ê hemû şervanên ku di sala 2021’an de bêyî dudilî çek rakirin, ji malbata xwe qut bûn û bi pêşengiya fermandarê nemmir Şehîd Xebat de daketin qada şer, silav dikim. Şervanên Dêrikê, bi salan in li pey şopa şehîd Xebat ji Dêrikê destpê kirin û heta Dêrazorê bi ruhekî neteweyî di qadên şer de cih girtin. Ji bo gelê me yê bi rûmet û hêja dîrokek nû nivîsandin.”
‘EM Ê CAREKÎ DIN ÊRÎŞAN TÊK BIBIN’
Em îro dikevin nava dîrokekî nû, pêvajoyeke nû didin destpêkirin. Em ê bi pêşengiya gelê xwe û di fermandariya YPG û YPJ’ê de, carekî din êrîşên hovane yên li dijî gelê xwe têk bibin. Em ê carekî din dirûşmeya ewil ku şervanan di eniya hêrî pêş a şer de berzkirin bi dengekî bilind biqîrin: ‘Yan mirin, yan jiyan, yan serkeftin!’
Em ê bi ruhê 2012’an re, bi hişmendiya neteweyî û Kurd ji nû ve destpê bikin. Em ê êrîşên saxtekaran têk bibin. Yên ku li dijî Kurdîtiyê êrîş dane destpêkirin, bila bizanin ku em ne Kurdên berê ne. Em êdî ne Kurdên razayî ne. Em kesek jî bimînin, em ê wan ji van xakan tune bikin. Rojava ne xaka we ye. Rojava ya gelê Dêrikê ye.
‘EM Ê BI GELÊ XWE RE BI SER BIKEVIN’
Ez bang li gelê me yê bi me re dikim; Em zarokên we ne. Em ê bi we re hebin û bi we re bi ser bikevin.
Gelê me yê li Ewropayê bi rojan in li ser piyan in. Em soz didin gelê xwe yê li Ewropa û hemû gelê xwe; em ê bu ruhê we ya berxwedanê, berxwedaneke mezin nîşan bidin.
Ez carekî din bang li gelê Dêrikê dikim; Em zarokên we ne û em ê heta dawî we biparêzin. Sed canê me hebe, em ê fedayî gelê Rojava û Dêrikê bikin. Sed canê me hebe, em ê fedayî Rêberê Kurdistanê bikin.
Heta dawî serkeftin bi we re be.”
