Gelê li Başûrê Kurdistanê, ji bo piştgiriya bi Rojava re bi rojan e li qadan e. Gel bi çalakiyan û kampanyayên alîkariyê ji bo piştgiriyê bi gelê Rojava re bike seferber bûye.
Wezareta Perwerdeyê ya Herêma Başûrê Kurdistanê doh bi daxuyaniyekê ragihandibû ku ji bo piştgiriya bi Rojava re wê îro li dibistanan di dersên destpêkê de qala berxwedana Rojava û mijara yekîtiya neteweyî ya Kurd bê kirin.
Ji roja destpêkê ya berxwedana li Rojava û vir ve li zanîngehan çalakiyên girseyî têne lidarxistin.
Li aliyê din, welatiyên dilxwaz, rêxistinên civakî yên sivîl û partiyên siyasî kampanyayên xwe yên ji bo alîkariyê bênavber dewam dikin.
ÇEMÇEMAL
Li dibistanên bajarokê Çemçemal waneya yekem li ser piştgiriya Rojava, netewe û dîroka gelê Kurd veqetandin û mamosteyan bi xwendkaran re dîroka gelê Kurd, têkoşîn û berxwedana Rojavayê Kurdistanê nîqaşkirin.
HELEBCE
Li Dibistana Seretayî ya Sîrwan a Helebê weke li dibistanên din di dersa destpêkê de mijara berxwedana Rojava hate nirxandin. Xwendekaran bi baldariyeke mezin li dersê guhdarî kirin. Mamosteyan qala girîngiya berxwedanê kirin.
KOYE
Li navçeya Koye ya Hewlêrê li Lîseya Gomeşîn Şêxan bi dirûşma “Rojava û Rojhilatê Kurdistanê yek welat” xwendekaran berxwedana Rojava silav kirin. Mamosteyan di çalakiyê de bal kişandin ser êrişên çeteyên dewleta Tirk, DAÎŞ û HTŞ’ê û girîngiya hişmendiya neteweyî ya xwendekaran destnîşan kirin.
HEWLÊR
Hîndekar û xwendekarên Zanîngeha Polîteknîk a Hewlêrê ji bo piştgiriya bi Rojava re çalakî lidar xistin. Di çalakiyê de ji her kesî hate xwestin ku ji bo piştgiriya bi Rojava re bikevin nava liv û tevgerê.
LI SILÊMANIYEYÊ KAMPANYA ALÎKARÎ
Li Zanîngeha Silêmaniyeyê, ji bo alîkariya bi Rojava re kampanya alîkariyê ya ji bo 5 rojan hate destpêkirin.
Li Îdareya Serbixwe ya Germiyanê bi navê “Germiyan bi hawara Rojava ve digihêje” kampanya alîkariyê hate destpêkirin.
