Welatiyê ku ji Başûrê Kurdistanê tevlî seferberiyê bû û di mewziyên herî pêş ên berxwedana Rojava de cihê xwe girt, wiha got, “Ger em yek bibin, cîhan jî were nikare me têk bibe.”
Peyama welatiyê ji Başûr ku ji mewziyên berxwedanê şand, wiha ye:
“Ez silavên berxwedanê ji hemû Kurdên li her derên cîhanê re dişînim. Wekî hûn dibînin gelê me li Rojava, li parçeyên din ên Kurdistanê li Rojhilat, Bakur û Başûr li dijî qirkirin û dagrikeriya mezin têdikoşe.
Em Kurd, çi ji destê me were em ê bikin. Em bizanibin ku ji xeynî Kurdan tu kesî me nîne. Ji ber vê xwişk û birayên min; bêdeng nemînin. Xwişk û birayên min ên li Ewropa û Başûrê Kurdistanê we nîşan da ku hûn Kurd in û xwedî helwest in. Mirovên me yên ji her derê dest bi hatina Rojava kirin. Ev jî pir hêja û pîroz e. Em hêvî dikin ku di têkoşîna xwe de bi serkeftî bin. Divê hûn bêdeng nemînin. Divê bi çalakiyên hin xurttir her derê bihejînin, bila ji we bitirsin. Em ne pez in. Her kes dibêje qey wê werin û serê me jê bikin. Lê 80 kes li Helebê 6 rojan li dijî dewletê şer kir. Ger gelê me bibe yek cîhan jî were nikare me têk bibe. Serkeftin ji bo gelê Kurd, serkeftin ji bo gelê Rojava, silav ji gelê Kurd re.”
