Li Silêmaniyê bi pêşengiya jinan ji bo piştgiriya Rojava û şervanên jin meşek dest pê kir. Li bajarê ku ev çend roj in bi sed hezaran kes kolanan naterikînin, îro jî meşeke bi heybet hat li dar xistin.
Di meşê de bêyî navber dirûşmên “Jin, jiyan, azadî”, “Rojava ne bi tenê ye”, “Rojava, Rojhilat, Kurdistan yek welat e”, “Yek yek ye, Kurdistan yek welat e” û “Şehîd Deniz namire” hatin berzkirin.
Girseya ku saetên nîvro li ber Parka Giştî kom bû, bi alayên Kurdistanê û rengên neteweyî xwe xemilandin. Ji zarokan heta ciwanan, ji kal û pîran heta jinan, bi hezaran kes li pey pankarta ‘Yekşema Şehîd Deniz’ dest bi meşê kirin. Gelek rêxistinên jinan, ciwanan û saziyên civaka sivîl beşdarî meşê bûn. Coşa di meşê de, bi taybetî bi pêşengiya jinan veguherî çalakiyek bi heybet.
Di dema meşê de car caran welatiyan ji girseyê re axivîn û hestên xwe anîn ziman. Di axaftinan de êrîşên li ser Rojava hatin şermezarkirin; bal hat kişandin ser têkiliyên di navbera çeteyên HTŞ, DAÎŞ û dewleta Tirk de. Di heman demê de bang li hemû gelê Kurd hat kirin ku berxwedanê mezin bikin. Axaftvanan piştgiriya welatên Ewropa û DYE’yê ya ji bo çeteyên HTŞ û DAÎŞ’ê jî rexne kirin.
