Fermandariya Giştî ya Yekîneyên Parastina Gel (YPG) bi boneya salvegera 11’an a Serketina Kobanê ya li hemberî çeteyên DAIŞ’ê daxuyaniyek weşand.
Daxuyanî bi vî rengî ye:
’’Di salvegera 11’emîn a serkeftina berxwedana Kobanê û têkçûn û derxistina rêxistina terorîst a DAIŞ’ê ji herêmê de, em îro di qonaxek dîrokî ya girîng de ku ne tenê Kobanê, lê gelên herêmê û hemû mirovahiyê eleqedar dike, derbas dibin. Ev salveger ne tenê serkeftinek leşkerî bû, lê şoreşek îradeyê û qîrînek jiyanê li hember projeyek mirin û tariyê bû.
Beriya 11 salan, Kobanê bi yek ji êrişên herî dijwar ên ku ji hêla DAIŞ’ê ve; rêxistina herî hov û terorîst a serdema nûjen ku dixwest îdeolojiya xwe ya tundrew bi rêya komkujiyan, kolekirinê û wêrankirina sîstematîk a mirovahiyê û şaristaniyê ferz bike, re rû bi rû ma. Wê demê, Kobanê ji her alî ve hatibû dorpêçkirin. Tevî îmkanên biçûk lê baweriya bi dozê, girêdana bi axê û îradeya polayî hebû.
Kobanê bû sembolek gerdûnî ya berxwedanê û şerê wê destpêka hilweşîna rastîn a DAIŞ’ê nîşan da. Her wiha ew efsaneya rêxistina ku xwe wekî hêzek neşikestî pêş xistibû, şikand. Ji kolanên Kobanê, derbên yekem ên biryardar hatin avêtin û rê li ber rizgarkirina tevahiya bajar û gelan ji destê terorê hate vekirin.
Di vê salvegerê de, em bi rêzgirtineke mezin şehîdên Kobanê yên ku jiyana xwe ji bo parastina hemû mirovahiyê kirin qurban û bi xwîna xwe sînorên rûmet û azadiyê diyar kirin bi bîr tînin. Şerkirin û qehremaniya wan ne tenê ji bo parastina bajarekî, lê ji bo nirxên jiyana hevbeş, mafê diyarkirina çarenûsa gelan û redkirina hemû şêweyên zordarî û tundrewiyê bû.
Em bi serbilindî û şanazî şervanên xwe; şervanên Yekîneyên Parastina Gel (YPG) û Yekîneyên Parastina Jin (YPJ) yên ku îdealên herî bilind ên qehremanî û fedakariyê temsîl kirin û îspat kirin ku îradeya rêxistinkirî ya gel dikare hêzên herî dijwar ên tarîtiyê têk bibe, silav dikin. Beşdarbûna jinan li eniyên pêş peyamek şoreşger bû ku zihniyeta bindestî û baviksalarî ku DAIŞ hewl da biçîne, şikand û piştrast kir ku rizgarkirina civakê bi rizgarkirina jinan dest pê dike.
Her wiha em spasî û rêzgirtina xwe ya bê sînor ji bo gelê Rojava, Bakur, Başûr û Rojhilatê Kurdistanê, ji bo gelê me yê Kurd li Ewropayê û ji bo hemû gelên cîhanê û hêzên azad ên ku bi awayekî siyasî, mirovî û bi rêya medyayê li kêleka Kobanê sekinîn û red kirin ku bajar bi çarenûsa wê re bihêlin, pêşkêş dikin. Vê hevgirtinê îspat kir ku doza Kobaniyê bi rastî jî dozeke mirovî bû.
Serkeftina li Kobanê di çarçoveya şerê li dijî terorê de ne bûyerek demkî bû, lê belê kêliyek dîrokî ya hişyariyê bû û piştrast kir ku tundrewî tenê bi çekan nayê têkbirin, lê di heman demê de bi projeyek demokratîk, bi îradeya gel û bi modelek alternatîf a li ser bingeha edalet, wekhevî û jiyana hevbeş di navbera hemî civakan de jî tê têkbirin.
Îro, yanzdeh sal piştî wê serkeftina dîrokî, Kobanî careke din rastî gef, dorpêçkirin û êrişan tê. Bi berdewamî hewldanên têkbirina îradeya gelê wê û ceribandina wê ya demokratîk tê kirin. Li ser vê bingehê em piştrast dikin ku ev polîtîkayên dijminane, çiqas amûrên wan cûrbecûr bin jî, dê nikaribin îradeya Kobanê bişkînin an jî rastiya rola wê ya dîrokî ji holê rakin.
Em bi eşkereyî radigihînin: Çawa ku me DAIŞ ji hêla leşkerî û îdeolojîk ve têk bir, em soz didin ku em ê têkoşîna xwe bidomînin da ku hemû kesên ku zîhniyeta DAIŞ’ê diparêzin û hemû kesên ku dixwazin desthilatdarî, zilm û jinavbirinê ji nû ve hilberînin têk bibin. Ji ber ku zîhniyeta ku kuştin, dorpêçkirin û birçîbûnê rewa dike, ew heman zîhiniyeta DAIŞ’ê ye. Lewra em ê parastina rewa ya gelê xwe, axa xwe û mafên xwe bidomînin. Em ê dilsozê xwîna şehîdan bimînin, bi biryara berxwedanê ve girêdayî bin da ku civakek piralî û demokratîk ku rûmet û azadiya mirovan bêyî cudahî garantî bike, ava bikin.
Kobanê caran qet bajarekî asayî nebûye. Ew her gav dibistanek berxwedanê bû û dê her bimîne. Ew çirayek ji bo şervanên azadiyê ye û peyamek zelal ji bo cîhanê ye ku gelên baweriya xwe bi mafê jiyan û azadiyê tînin nayên têkbirin û dê her serkevin.
Şehîd namirin
Berxwedan Jiyan e
Bijî Kobanê; sembola rûmet, berxwedan û azadiyê.“
