Gerîlayên YJA Starê derbarê êrîşên li ser Rojava û berxwedana berdewam dike de nirxandin kirin.
Gerîlaya YJA Starê Arjîn Berxwedan di destpêka axaftina xwe de berxwedana şervanên YPG-YPJ û QSDê silav kir û diyar kir ku rêveberiya demkî ya li Sûriyeyê û dewleta Tirk ji bo êrîşî axa Rojava bikin, bi hev re tevdigerin.
Arjîn Berxwedan anî ziman bi van êrîşan bi taybetî jinan hedef digirin û got:
“Berî her tiştî, em gelê xwe û berxwedana wan a bi rûmet silav dikin û em hemû hevalên xwe yên şehîd bi rêzdarî bi bîr tînin. Îro dewleta Tirk û rejîma Sûriyeyê êrîşî gelê Kurd dikin. Bi taybetî êrîşî jinan dikin. Ji ber ku Rêbertî dibêje jin pêşengiya vê têkoşînê dikin; ji ber vê yekê, jinên Kurd dibin hedefa çeteyan. Em dibînin ku jinên Kurd ên ku ji dîrokê heta roja îro, di her serdemê de pêşengiya berxwedanê kirine ji hêla çeteyan ve hedef tên girtin.
Çeteyên HTŞ’ê dixwazin bi êrîşa li ser şervanên jin çanda jinên berxwedêr ji holê rakin. Helbet wê jinên Kurd serê xwe li ber wan netewîne; berevajî vê, jin têkoşîna xwe hîn bilindtir dikin. Gelê Kurd li her çar parçeyan rûmeta xwe parastiye û bi helwesta xwe bersiva kesên ku êrîşî jinan dikin daye. Wekî gerîlayek YJA Starê dibêjim ku em bi gelê xwe re ne û em ê bi bilindkirina têkoşînê ji berxwedana gel û şervanên YPJ’ê re bibin bersiv.
Em hemû gelê xwe yê berxwedêr û jinên Kurd silav dikin. Ev êrîş li dijî îradeya jinên azad e. Dixwazin jinên Kurd ji holê rakin. Çawa ku jinên berxwedêr li eniyan serî natewînin, em jî serî li ber dijmin natewînin; em ê bi têkoşîna xwe dijmin têk bibin.”
‘GELÊ ME BERXWEDAN GIHANDIN KOLANAN’
Gerîlaya YJA Starê Arîn Amara jî berxwedana gel û jinên Kurd silav kir û got:
“Gelê me careke din rihê berxwedana ku di 2014-2015’an de hatiye raberkirin, nîşan da. Gelê me ev rih vejand û serhildan û berxwedan gihandin kolanan. Ev berxwedan li dijî HTŞ’ê ya ku berdewamiya rejîma Baasê ye. Gelê me mîna tofanekê bi ser dijmin de diçe; bawer dikim ku dijmin wê li hember vê tofana gelê me hilweşe. Wekî gerîlayên li çiyayên azad, em hêz û moralê xwe ji gelê xwe yê serhildêr digirin.
Her kes baş dizane ku jinên Kurd di vê berxwedanê de rolek pêşeng dilîzin; ji ber vê yekê jin rasterast hedef tên girtin. Xwestin di şexsê jinên Kurd de îradeya jina azad hedef bigirin. Xwestin di şexsê şervanên YPJ’ê de hebûna jinên Kurd ji holê rakin; lê divê ew bizanin ku eger kesek bikeve, deh kes wê li şûna wan rabin û têkoşînê bidomînin. Di tu serdema dîrokê de me hovîtiya çeteyên kujer û hovîtiyeke wiha nedîtiye.
Lê ev rewşê hêrsa me ya tolhildanê gur kiriye. Ew qet nikarin hêza me bişkînin. Bi hedefgirtina cenazeyekê nikarin hêza me tuene bikin. Em bi hemû hêza xwe li kêleka gelê xwe û hevalên xwe yên jin in. Em wan qehremanên ku li eniyên pêş ji bo rûmetê têdikoşin silav dikin û em dibêjin, “Bijî berxwedana Rojava!”
‘HEVAL DENÎZ BÛ SEMBOLA BERXWEDANÊ’
Gerîla Rûgeş Arteş anî ziman êrîşên li ser Rojava komployek li dijî gelê Kurd e û bal kişand ser van xalan:
“Ev êrîş ji bo ku rê li ber bidestxistina statuya Kurdan bigirin têne kirin. Dewleta Tirk li aliyekî îdîa dike ew li çareseriyê digere û li aliyê din jî li ser gelê Kurd komkujiyan dike. Ev nayê qebûlkirin. Bi taybetî êrîşên li ser Rojava û hedefgirtina şervanên jin nîşan didin ku tehemulî hebûna Kurdan nakirin; heta cenazeyê şehîd Denîz ji avahiyê avêtin.
Heval Denîz ji ber girêdana xwe ya bi dozê re çalakiya fedaî kir. Van çalakiyan careke din nîşan da ku jinên Kurd qet teslîmbûnê qebûl nakin. Şehîd Denîz bi çalakiya xwe ya fedaî, ji bo jinên li çaraliyê cîhanê bûye sembola berxwedan û serhildanê.
Wekî gerîlayên YJA Starê em rastî û berxwedana gelê xwe dibînin. Bi taybetî gotinên gelê me, ’em ji mirinê mezintir in’, hêz û moralê dide me. Her çiqasî êrîşên hovane li dijî şervanên YPJ’ê dikin jî wek jinên Kurd û gelê Kurd em ê tu carî dev ji doza xwe bernedin û em ê ji berpirsiyarên van êrîşên hovane hesab bipirsin.
Rast e, gelê me di berxwedaneke dîrokî de ye; îro, ji her çar perçeyên welat ji bo parastina rûmet û axa xwe hatin gel hev. Em vê yekê pir baş dizanin; divê gelê me jî pir baş zanibe ku em tenê bi parastina hev û parastina nirxên xwe dikarin bijîn.
Di dawiyê de, em vê dibêjin: Bijî berxwedana Rojava.”
