Her ku diçe piştgiriya gel û beşên cûda yên Başûrê Kurdistanê ya ji bo Rojavayê Kurdistanê berfirehtir dibe. Di vê çarçoveyê de du eşîrên mezin yên Başûr ên bi navên Terxanî û Zend jî bi daxuyaniyan piştgiriya xwe ya ji bo Rojava anîn ziman.
Serokê Eşîreta Zend Îzamedîn Kuxe Mihemed da zanîn ku ew wek binemalek yekgirtî di wê baweriyê de ye ku ti sinor di nava Kurdistanê de nîne û got: “Hest û heskirine ji Rojhilat ji bo Rojava. Dilê me ji bo piştgiriya xwişk û birayên me lêdide ku ew ji bo azadî, rêz û jiyanek baş têdikoşin.”
Îzamedîn Kuxe Mihemed da zanîn ku piştgiriya Kurdên Rojava ne tenê helwestek siyasiye û got: “Ev berpirsyartiyek mirovî û nîşaneya yekgirtinê ye. Ger Kurdek êş bibîne em hemû diêşin, ger Kurdek serkeftîbe em hemû serkeftîne.”
Di dawiyê de jî Serokê Eşîreta Zend Îzamedîn Kuxe Mihemed got: “Em wek binemala Zend piştgiriya xwe ji bo Rojava dubare dikin, emê heta dawiyê li gel Rojava bin.”
Eşîreta Terxanî ya ser hoza Caf jî peyamek piştgiriyê ji bo Rojava parve kir û got: “Em piştgiriya xwe ji bo birayên xwe yên Rojavayê Kurdistanê radigihînin. Em dubare dikin ku her hewldanek tirsonek û sernekeftî ya dijminan wê nikaribe ruhê hevrebûn û netewîbûna me tine bike. Wek hercarê em xwe bi pêşengê hemû şoreşek û qurbaniyan dibînin, serşorî ji bo dijminên Kurd û Kurdistanê.”
