Koordînasyona Kongra Star bi boneya 11’emîn salvegera rizgarkirina bajarê Kobanê ji destê çeteyên DAIŞ’ê, daxuyaniyek weşand.
Di daxuyaniyê de wiha hat gotin:
“Di salvegera Kobanê de em tevahî şehîdên berxwedana Kobanê, bi rêzdarî bi bîr tînin û soz didin ku em ê xwedî li mîrasa wan derkevin.
Di sala 2014’an de dijminê mirovahiyê DAIŞ, bi piştgiriya dewleta Tirk êrişeke hovane li ser bajarê berxwedanê da destpêkirin. Erdoganê ku bi hemû derfetên teknîk, çete û ragihandina xwe ketibû dewrê, ji bo Kobanê bikeve, kêlî bi kêlî li benda ketina bajarê serhildêr bû lê bi ruhê yekitiya Kurd, bi ruhê piştgiriya cîhanê, bi hêza şervanên YPJ, YPG’ê, bi ruhê seferberiya ku ji hemû deverên cîhanê mirovan pêl bi pêl berê xwe da Kobanê, serkeftineke dîrokî li Kobanê çêbû.
Lê dewleta faşîst a Tirk û serkêşê çeteyan Erdogan û DAIŞ’ê ev serkeftin tu carî hezim nekirin. Ji 2014’an heta niha li ser Kobanê êrişên xwe berdewam kirin. îro jî bi planeke navneteweyî dîsa bi heman çeteyên DAIŞ, HTŞ’ê, dewleta faşîst a Tirk êrişên xwe li ser Kobanê zêde dike. Kobanê weke girêkek di qirika Erdogan de maye. Di berxwedana Kobanê de bi hezaran kesên ji çar perçeyên Kurdistanê û cîhanê hatin tevlî berxwedanê bûn û ji bo ku Kobanê rizgar bibe bi fedayî şer kirin, DAIŞ’ê têk birin. İro jî heman ruh, heman mejî, heman helwest ji bajarê berxwedanê, li hemberî çeteyên Colanî û Erdoxan tê raberkirin. Dijminê tirsonek û nemerd Kobanê di bin êrişan de hiştiye. Av, kehrebe, înternet li ser gel qut kiriye. Zarok ji ber sermaya zêde jiyana xwe ji dest didin. Rewşa mirovî ber bi kerasetê ve diçe. Bi hejmareke zêde ya çeteyên Colanî û teknîkeke mezin dîsa êrişî Kobanê dikin.
Lê tişta ku ji bîr dikin ev e; ruhê berxwedana Kobanê hê zindî ye û tu caran rê nade van êrişan. Wê Kobanê bi ruhê berxwedanê dîsa êrişên dijmin têk bibe. Kobanê Kurdistan kir yek, Kurdistan bû xwedî ruhek.
Em ê jî wek jinên Rojavayê Kurdistanê bi ruhê berxwedana Kobanê, bi hemû hêza xwe ji bo serkeftin, rûmet û hebûna xwe li ber xwe bidin. Em bang li hemû jinên Kurdistan û cîhanê dikin ku di salvegera Kobanê de bi destekî, bi ruhekî, careke din xwedî li bajarê berxwedêr û destkeftiyên jinan derbikevin. Em ê bi berxwedana xwe Kobanê ji çeteyên dewleta Tirk û çeteyên Colanî re bikin cehennem û wan poşman bikin.”
