Platforma Saziyên Demokratîk a Amedê têkildarî êrîşên çeteyên dewleta Tirk, DAÎŞ û HTŞ’ê yên li ser Rojava li Qada Şêx Seîd a Amedê daxuyanî da. Nûnerên rêxistinên civakî yên sivîl, partiyên siyasî û gelek welatî beşdarî daxuyaniyê bûn. Di çalakiyê de bê navber dirûşmeyên “Bijî berxwedana Rojava” û “Jin jiyan azadî” hatin berzkirin.
Hevserokê Amedê yê Partiya Wekhevî û Demokrasiyê ya Gelan (DEM Partî) Abbas Şahîn ev tişt got, “Li Mêrsînê ji bo çêkirina tirsê ciwanek qetil kirin. Ew nikarin me bitirsînin. Em ê berxwedanê bidomînin. Têkoşîna me ya rewa dê bi ser bikeve.”
Hevseroka Amedê ya DBP’ê Ruçem Vefa Elyakut jî diyar kir ku zihniyeta qirker wê li dijî têkoşîna jinan têk biçe.
Parlamenterê DEM Partiyê Sînan Çiftyurek jî got, “Azadiya Kobanê azadiya gelê Kurd e. Îro roja şkestina êrîşa hovan e. Gelê Kurd di nava yekîtiyê de têkoşîna xwe bilind dike. Gelê Kurd wê li dijî zihniyeta qirker dîsa bi ser bikeve.”
Piştî daxuyaniyê gel bi berzkirina dirûşmeyên “Bijî berxwedana Rojava” û “Em ê bi berxwedanê bi ser bikevin” heya avahiya rêxistina navçeya Sûrê ya DEM Partiyê meşiya.
ŞIRNEX
Platforma Saziyên Demokratîk a Şirnexê têkildarî êrîşên li ser Rojava, binçavkirin û girtinên ku di rojên dawî de zêde bûne, daxuyanî da. Daxuyanî li ber Edliyeya Şirnexê hate dayîn. Nûnerên rêxistina girseya demokratîk, partiya siyasî û TUHAD-DER’ê û gelek welatî tevlî daxuyaniyê bûn.
Bi berzkirina dirûşmeyan daxuyanî bi dawî bû.
Piştre gel bi berzkirina dirûşmeyan heya Qada Cûmhûriyet meşiya.
Li Şirnex û navçeyên wê ji 8’ê Çileyê ve bi hinceta çalakiyên piştevaniya ji bo Rojava, herî kêm 78 kes hatine binçavkirin û zarok jî di nav de 16 kes hatine girtin.
