Nerazîbûnên navneteweyî ya li hember êrîşên komên girêdayî Hikûmeta Demkî ya Sûriyê ya ku ji aliyê Tirkiyeyê ve tên destekkirin li ser Rojava, berdewam dikin. Serokê Partiya Sosyalîst a Swîsreyê (SP), li ser êrîşan ji ANF’ê re axivî.
‘ÊRÎŞ TEQEZ NAYÊN QEBÛLKIRIN’
Wermuth diyar kir ku pêvajoya nû ya li Sûriyê piştî hilweşandina rejîma Esad li gorî bendewariyan nebûye û got ku êrîşên li ser Rojava nîşanek eşkere ya vê yekê ne. Cédric Wermuth, destnîşan kir ku ev êrîş nayên qebûlkirin û got ku rewş ne tenê pirsgirêkek ewlehiyê ye, di heman demê de krîzek mirovî ya cidî ye.
‘ROJAVA JI BO TEVAHIYA HERÊMÊ MODELEK MÎNAK E’
Wermuth da xuyakirin ku modela ku li Rojava hatiye avakirin, li ser bingeha wekheviya zayendî û rêveberiya demokratîk, ji bo Rojhilata Navîn mînakek girîng e. Cédric Wermuth, diyar kir ku ji ber vê Rojava ji aliyê rejîmên otorîter ve tê hedefgirtin û got ku divê hêzên pêşverû yên li Ewropayê ji bo parastina avahiya xweser a Rojava têbikoş in.
‘XIYANETEK NAYÊ QEBÛLKIRIN E’
Wermuth, helwesta welatên Rojavayî ya li hember êrîşên li ser Rojava rexne kir û bi bîr xist ku Kurdan di şerê li dijî DAÎŞ’ê de roleke girîng lîstine. Cédric Wermuth, anî ziman ku tevî vê yekê jî Kurdan piştgiriyeke têrker negirtine û ji bo helwesta heyî got “Xiyaneteke ku teqez nayê qebûlkirin.”
‘DIVÊ EM ROJAVA BIPARÊZIN’
Wermuth, bang li hikûmetên Ewropayê û rêxistinên civaka sivîl kir ku Kurdan biparêzin û statuya xweser û modela demokratîk a Rojava biparêzin. Cédric Wermuth, di dawiyê de diyar kir ku ev hem ji perspektîfeke mirovî û hem jî ji perspektîfeke jeopolîtîk girîng e.
