Hevpeymaniya Hêzên Siyasî yên Rojhilatê di civîneke ku di 9’ê Adarê de hat lidarxistin de, logoya xwe diyar kir. Hevpeymaniyê daxuyaniyek nivîskî der barê sembol û wateya logoyê de weşand. Di daxuyaniyê de girîngiya logoyê hat destnîşankirin û hat gotin ku wan ji abîdeyê ku wekî gora Împaratorê Medyayê Qiral Kyaksar/Keyhusrev tê hesibandin îlham girtiye.
Di daxuyaniyê de hat diyarkirin ku roja di logoyê de ji sembola rojê ya di gora kevirî ya Qizqapan de li Silêmaniyê îlhamê girtiye û wiha hat gotin: “Ev abîdeya dîrokî li nêzîkî gundê Zerzî li parêzgeha Silêmaniyê, li dora Çemê Razanê ye û dîroka wê heya derdora beriya zayînê 590 diçe. Ev avahî wekî gora Hvakhshatra (Kyaksar/Keyhusrev), hukumdarê sêyemîn ê Împaratoriya Medyayê tê hesibandin. Sedema çêkirina abîdeyê bîranîna aştiya di navbera Qiralê Medyayê Kyaksar û Qiralê Lîdyayê Alyattes de ye. Piştî şerekî pênc salan di navbera Med û Lîdyan de, di sala 580 BZ de rojgirtin çêbû; ev bûyer ji hêla her du aliyan ve wekî nîşaneyekê hat pejirandin û şer hat rawestandin û peymanek aştiyê hat çêkirin.”
Di daxuyaniyê de hat destnîşankirin ku di sembola rojê ya li Qizqapanê de 11 tîrêj hene û ev hejmar di logoyê de bûye 21. Di dawiya daxuyaniyê de wiha hat gotin: “Ev hem pabendbûna bi sembola rojê ya kevnar û rojê di ala Kurdî de nîşan dide û hem jî yekîtî û yekparebûnê nîşan dide. Xeleka spî ya ku li navenda rojê hatiye danîn hem behsa girtina rojê ye ku di navbera du hêzên mezin de aştî anî, hem jî sembola ramana xebat û hevgirtinê ye.”
