Piştî erkdarkirina Ibrahîm Mislim a weke rêveberê bajarê Kobanê ya ji aliyê Hikumeta Demkî ya Sûriyeyê ve, gelê bajarê Kobanê çalakiya protestoyê lidar xist û ev yek red kir. Beşdarên çalakiyê ji ANF’ê re axivîn û gotin, gelê bajarê Kobanê wê bi xwe rêveberê xwe erkdar bike û xwe bi rêve bibe.
‘KESÊN LI DERVEYÎ ŞOREŞA ME EM QEBÛL NAKIN’
Jina bi navê Hêvîn Îsmaîl diyar kir ku yê îradeya jinê nas neke, em qebûl nakin û wiha got: “Em ê li hemberî vî erkdarî rabin û helwest nîşan bidin. Ew ne li gorî gelê Kobanê ye, divê em di nava xwe de kesê li gorî bajarê xwe erkdar bikin. Kesê ku ne li gorî jin be, em jî weke jin wê yekê napejirîn in û em qebûl nakin. Em kesên ji derveyî şoreşa xwe qebûl nakin.”
Welatiyê bi navê Hecî Ehmed dibêje divê demildest ev biryar bê rawestandin û ew ê bajarê xwe bi rêve bibin û kesê li gorî bajarê Kobanê ew ê ji nava xwe erkdar bikin. Hecî Ehmed wiha got: “Ev biryar nayê qebûlkirin, di destûran de heye ku em gel di nava xwe de rêveberiya xwe hilbijêrin, em vê yekê şermezar dikin. Divê li hemberî vê yekê êdî biryar bê girtin ku ev yek bê rawestandin û em êdî di nava xwe de rêveberiya xwe hilbijêrin. Weke gelê Kobanê xwedî ewqas şehîd û destkeftî ne, divê ev hikumet jî vê biryarê rawestîne.”
