AMED: Şaxa Komeleya Mafên Mirovan (ÎHD) ya Amedê û xizmên windayan ji bo hefteya 898’emîn a çalakiya xwe ya “Bila winda bên dîtin, kiryar bên darizandin” li ber Abîdeya Mafê Jiyanê ya li Parka Koşûyolû ya navçeya Rezanê kom bûn. Xizmên windayan bi wêneyên xizmên xwe yên ku di dema binçavkirinê de hatine windakirin an jî hatine kuştin li qada çalakiyê Amade bûn. Di çalakiya vê hefteyê de li kiryarên Cemal Kavak hat pirsin ku cenazeyê wî piştî ku di 24’ê Nîsana 1996’an de li Amedê di binçavan de winda bû, hatibû dîtin. Daxuyanî bi çalakiya rûniştinê bi dawî bû.
ÊLIH: Xizmên Windayan û Şaxa Komeleya Mafên Mirovan (ÎHD) a Êlihê di hefteya 724’emîn a çalakiya xwe ya “Bila winda bên dîtin û kujer bêne darizandin” de li ber Bîrdariya Mafên Mirovan a Cadeya Gulistanê li aqubeta Kadrî Yilmazê ku piştî di Nîsana 1994’an de li Amedê ji aliyê polîsan ve hatibû binçavkirin û careke din agahî jê nehatin wergirtin pirsîn. Di çalakiyê de Rêveberên İHDê û Xizmên Windayan û gelek kes amade bûn û wêneyên kesên ku di dibinçavan de hatibûn windakirin û kuştin hildan. Rêveberê ÎHDa Êlihê Alî Karadogan çîroka Kadrî Yilmaz xwend. . Daxuyanî bi çalakiya rûniştinê bi dawî bû.
COLEMÊRG: Şaxa Komeleya Mafên Mirovan (ÎHD) ya Colemêrgê û xizmên windayan di hefteya 224’emîn ya çalakiya xwe ya “Bila winda bên dîtin, kujer bên darizandin” de aqûbeta Velat (10), Îsmaîl (11) û Sibel Şedal (7) pirsîn. Çalakî li Kolana Hunerê ya navçeya Geverê pêk hat û di çalakiyê de wêneyên kesên kujerên wan nediyar in hatin hilgirtin. Tevî malbatên windayan, nûnerên saziyên sivîl û partiyên siyasî jî tev li çalakiyê bûn. Daxuyanî bi çalakiya rûniştinê ya deqîqeyekê bi dawî bû.
ÎZMÎR: Çalakiya Şaxa ÎHD’ê ya Îzmîrê bi daxwaza “Bila winda werin dîtin, kujer werin darizandin” ku du hefteyan carekê tê lidarxistin, li ber Sumerbanka Kevin a Konakê berdewam kir. Di çalakiyê de pankartên “Winda wijdana te ne, xwedî derkeve” û “Winda diyar in, kujer li kuderê ne?” hatin hildan. Di daxuyaniyê de aqûbeta rewşenbîrên Ermenî hate pirsîn. Daxuyanî bi çalakiya rûniştinê bi dawî bû.
