Rêze konferansên “Komun şaredarî ye, şaredarî komun e” ya Desteya Rêveberiyên Xwecihî ya Demokratîk a DEM Partiyê li Rihayê dewam kir.
Çalakî li Salona Konferansê ya Tahîr Elçî ya Baroya Rihayê pêk hat û ji Riha û Semsûrê hilbijartî tevlî bûn.
Hevberdevka Desteya Rêveberiyên Xwecihî ya Demokratîk Canan Kebenç Ozkan bal kişand ser encamên hilbijartinên xwecihî yên 31’ê Adara 2024’an û anî ziman ku dema nû ji bo avakirina civaka demokratîk û aştiyê berpirsyariyeke girîng bi xwe re tîne.
Canan Kebenç Ozkan anî ziman ku civaka demokratîk ji rêveberiya xwecihî cuda nabe û got, “Sîstemeke ku gel xwe bi rê ve bibe ji qada xwecihî ava dibe.”
Canan Kebenç Ozkan destnîşan kir ku ji bo sîstemeke hiqûqê ya demokratîk û azadiya gelê Kurd rêveberiyên xwecihî xwedî roleke krîtîk e.
Di dewama axaftina xwe de Canan Kebenç Ozkan gotina, “Şaredarî tevgera rizgarkirina rûyê erdê ye” ya Rêber Apo bi bîr xist û got, şaredarî divê ne tenê saziyên xizmetê be, di heman demê de bibin avaniyên welê ku ji bo pirsgirêkên civakî çareseriyê diafirînin.
Piştî axaftinan sînevîzyonek li ser nêrînên Rêber Apo yên têkildarî rêveberiyên xwecihî û komunan hate nîşandan. Konferansê piştre li çapemeniyê girtî dewam kir.
