Malbata Nêrgiz Mihemedî derbarê serdana xwe ya dawî û rewşa tenduristiya Nêrgiz de, agahî dan rêxistinên mafên mirovan. Li gorî daxuyaniya malbatê, tevî ku doktorên girtîgeha Zencanê bi fermî ragihandine ku rewşa Nêrgizê ya tenduristiyê nebaşe û pêdiviya wê bi çavdêriya doktoran ya bi lez heye, Serdozgeriya Tehranê bi awayekî neqanûnî rê li ber derketina wê ya ji bo nexweşxaneyê digire.
Malbatê diyar kir ku Nêrgiz Mihemedî bi êşên giran ên sîng, serêş û kêmkirina kîloyan bi awayekî neasayî û tengenefesiyê re rû bi rû ye. Malbatê daxwaz kir ku demildest Nêrgiz ji bo navendeke bijîşkî ya pispor were veguhestin û hişyarî da ku dewamiya vê rewşê jiyana wê dixe metirsiyeke mezin.
Nêrgiz Mihemedî yek ji parêzvanên naskirî yên mafên mirovan ên li Rojhilatê Kurdistan û Îranê ye. Di sala 2023’yan de ji ber têkoşîna wê ya li dijî cezayê darvekirinê û parastina mafên jinan, Xelata Nobela Aştiyê jê re hatibû dayîn.
Nêrgiz Mihemedî di Çileya 2024’an de piştî neştergeriya weremê, ji ber sedemên tenduristiyê bi awayekî demkî hatibû berdan, lê di Çileya 2025’an de careke din hat girtin û şandin zindanê.
Hêjayî gotinê ye ku dadgeha Îranê bi tometa ‘rêxistinbûn û plankirin’ 6 sal cezayê girtîgehê li Nêrgiz biriye. Her wiha bi tometa ‘belavkirina nûçeyên derew’ salek û nîv ceza û 2 sal qedexeya derketina derveyî welat li ser hatiye ferzkirin.
