Hikûmeta Talîbanê ya li Efganistanê ragihand ku artêşa Pakistanê şeva Sêşemê jîngehên sivîlan ên li bajarên Kunarî Host û Paktikayê bombebaran kirine.
Berdevkê hikûmeta Talîbanê Zabihullah Mucahîd li ser medyaya dijîtal X’ê daxuyaniyek da, diyar kir ku Pakistanê qada hewayî ya Efganistanê binpê kiriye û da zanîn ku di encama êrîşê de 11 zarok, jinek û pîremêrekê jiyana xwe ji dest dan. Berdevk her wiha diyar kir ku 14 jin û zarok jî birîndar bûne û wêneyên sivîlên hatine qetilkirin, parve kirin.
Mucahîd îfade kir ku qadên ku hatine hedefgirtin jîngehên sivîlan in û êrîş tên wateya binpêkirina hiqûqa navneteweyî.
LI HOST VE PAKTIAYÊ SIVÎL BÛN HEDEF
Rayedarekî bajarê Hostê ku nexwestiye navê wî were eşkerekirin daxuyaniyek da AFP’ê û diyar kir ku di encama êrîşeke hewayî ya li ser xaniyeke li navçeya Sperayê de 9 kesan jiyana xwe ji dest dane û 10 kes jî birîndar bûne.
Çavkaniyeke herêmî jî ragihand ku di erîşeke li ser bajarê Paktikayê de 3 kesan jiyana xwe ji dest dane.
Artêşa Pakistanê pirsên AFP’ê yên têkildarî mijarê nebersivandin û hê têkildarî êrîşan daxuyaniyeke fermî nedaye.
RAGEŞIYA LI SER XETA SÎNOR
Êrîşên dawîn, piştî aramiya li ser xeta sînor a Efganistan-Pakistanê pêk hatin. Şer û pevçûnên ku di mehên ewil ên salê yên navbera her du welatan de, di dawiya meha Sibatê de veguherîbûn şerekî eşkere û li ser xeta sînor bûbûn sedema windahiyên mezin.
Li gorî rapora Neteweyên Yekbûyî (NY) ya meha Gulanê hate weşandin, bes di şer pevçûnên di navbera 1’ê Çileyê û 31’ê Adarê de herî kêm 372 sivîlên Efgan jiyana xwe ji dest dane.
