Serokwekîla Koma Partiya Demokrasî û Wekheviyê ya Gelan (DEM Partî) Gulistan Kiliç Koçyîgît li Meclîsê civîna çapemeniyê lidar xist.
Gulistan Kiliç Koçyîgît anî ziamn ku bi Pêvajoya Aştî û Civaka Demokratîk re Tirkiye ji qonaxeke gelekî krîtîk derbas dibe û got, “Bendewariya esasî ya me, civaka me û gelên me ew e ku ev pêvajo bi çarçoveyeke qanûnî şênber bibe û bi pêş ve biçe. Bêguman navnîşana îro ya çareseriyê siyaseta demokratîk û Meclîs e. Ji ber vê jî beriya ku Meclîs bê girtin, divê çarçoveya qanûnî ya pêwîst, sererastkirina qanûnî bi lez bixe rojeva xwe û qanûna ku Birêz Ocalan weke qanûna şaneya esasî yan jî qanûna taybet bi nav dike, tavilê pêşkêşî meclîsê bê kirin û bibe qanûn. Ji bo pêvajo bi hiqûqî misoger bibe divê Meclîs gavan biavêje. Rapora komîsyonoê nexşerêyekê datîne holê. Pêwîstî pê heye ku ev nexşerê bi lez bikeve pratîkê. Meclîsa ku rapor lê hate nivîsandin, di heman demê de divê bibe ew cih ku qanûna çareseriyê lê bê axaftin, nîqaşkirin û amadekirin. Girîng e Meclîs di vê pêvajoyê de bi xurtî rola xwe bi cih bîne, beriya bikeve betlaneyê divê bi lez gavê biavêje. Pêwîstiya aştiyê bi qanûnê, pêwîstiya Meclîsê jî bi karê ji bo aştiyê heye.”
Serokwekîla Koma DEM Partiyê anî ziman ku divê helwesta ku biryarên Dadgeha Mafên Mirovan a Ewropayê bi cih nîne bê terikandin û axaftina xwe bi vî rengî dewam kir:
“Bi taybetî gelekî girîng e ku ‘mafê hêviyê’ bi cih bê anîn. Ev yek di heman demê de rêgeza azadiyê û bingehîn e. Ji bo avakirina civaka demokratîk û aştiyê pêwîstiyeke şert e ku merc ji bo Birêz Ocalan bêne afirandin ku karibe di pêvajoya danûstandin û çareseriya demokratîk de rola xwe bi cih bîne, derfetên ragihandinê jê re bêne dayin û mesele di çarçoveya normên hiqûqa gerdûnî de bê nirxandin. Dawiya dawî ev mesele bêguman meseleya me hemûyan e. Ev mesele bêguman meseleya hemû partiyên siyasî û gelê me ye. Lê belê di vir de berpirsyariya herî mezin dikeve ser milê desthilatdariyê. Lewma desthilatdarî bêyî ku hîn zêde mijûl bike û li demê belav bike, divê bi lez teqwîmeke pêvajoyê eşkere bike û pêşnûme qanûna çarçoveyê pêşkêşî raya giştî bike. Her wiha divê vê qanûnê bi lez binirxîne û beriya navbera havînê derxîne.”
