Jin û dayikên li Elmanyayê, ji bo piştgiriya bi Rojava re û daxwaza aştiyê nîşan bidin, bi navê “Karavana Dayikan” dest bi rêwîtiyeke piştevaniyê dikin. Karavan wê ji Heilbronn û Hamburgê di 13’ê Hezîranê de bi rê bikeve û piştî çalakiyên hefteyekê wê 20’ê Hezîranê bigihêje Berlinê.
Ji amadekarên karavanê Monica Bunes anî ziman ku ew çalakiyê ji bo piştgiriya bi têkoşîna aştiyê, xwişk û biratiya gelan û azadiya jinan pêk tînin. Monica Bunes ku pênc zarok û çar neviyên wê hene, diyar kir ku ew bi rola parastin û mezinkirina jiyana dayikan radibe û destnîşan kir ku li hemberî şer divê dengê jinan hîn bi xurtî bilind bibe.
‘ROJAVA BÛ ÇAVKANIYA SÛDWERGIRTINÊ’
Monica Bunes ragihand ku tecrûbeya Rêveberiya Xweseriya Demokratîk a li Rojava bandor li afirandina fikrê karavanê kir û anî ziman ku keçên wê dema serdana herêmê kirin, modela jiyana bi hev re ya gel û baweriyên cuda ji nêz ve dîtin û nas kirin.
Monica Bunes destnîşan kir ku bi taybetî asta jinan a li nava jiyana civakî ya li Rojava û feraseta jiyana hevpar ji bo wan çavkaniya girîng a sûdwergirtinê bû û got, “Em Rojava weke modeleke welê dibînin ku mirov bi nasname û baweriya xwe bi hev re dijîn.”
PIŞTEVANIYA CIWANAN VEGUHERÎ FIKRÊ KARAVANÊ
Monica Bunes her wiha anî ziman ku karavana piştevaniyê ya ku di dema dorpêça li ser Kobanê de ciwanên ji Elmanyayê ava kirin, bandor li wan kir û diyar kir ku vê tecrûbeyê fikrê hewldaneke bi heman rengî ya li nava dayikan xurt kir.
Monica Bunes ragihand ku wan destpêkê nîqaş kirin ku biçin heta Kobanê, lê belê ji ber mercên heyî û berpirsyariya malbatên xwe biryar dan ku li seranserê Elmanyayê tûreke piştevaniyê pêk bînin.
WÊ JI DU RÊGEHAN BI RÊ BIKEVIN Û BIGIHÊJIN BERLINÊ
Rêgeha destpêkê ya Karavanê wê 13’ê Hezîranê ji Heilbronnê destpê bike. Dayik wê di ser Mannheim, Darmstadt, Kassel û Leipzigê bigihêje Berlinê.
Di rêgeha duyemîn de jî ku jin û dayik wê ji Hamburgê bi rê bikevin, di ser bajarên cuda re wê xwe bigihînin Berlinê û bi koma din re bigihêjin hev.
Çalakiya destpêkê ya karavanê wê li Heilbronnê bi mîtîngekê destpê bike. Her wiha di rê de jî wê bername, kombûn û çalakiyên piştevaniyê li navendên civaka Kurd ên li bajarên cuda bêne lidarxistin.
Rêwîtiya jin û dayikan wê 20’ê Hezîranê li Berlinê bi kombûna bi piştevaniya hevpar bi dawî bibe.
