Komîteya Şehîdan a Partiya Jiyana Azad a Kurdistanê (PJAK) di salvegera şehadeta Hebîbila Gulperîpûr û Reza Mamedî de ew bi bîr anî ku 25’ê Cotmeha 2013’an ji aliyê hêzên Îranê ve hatin şehîdxistin.
Daxuyanî wiha ye:
“Hevalên rêzdar Hebîbila Gulperîpûr bi navê rêxistinî ‘Bahoz Sine’ li zindana Urmiyeyê û Reza Mamedî li zindana Selmasê, di 25’ê Cotmeha sala 2013’an de ji aliyê Rejîma Komara Îslamî ya Îranê ve hatin darvekirin. Îro 13 sal di ser wê bûyerê re derbas dibin. Em wekî Komiteya Şehîdên Partiya Jiyana Azad a Kurdistanê (PJAK), bîranîn wan hevalan bilind û zindî radigirin û em girêdanbûna xwe ya bi rêya têkoşîna wan re teqez dikin.
Heval Hebîbila Gulperîpûr di dirêjahiya dîroka têkoşîna xwe ya li çiyayên azad ên nîştiman de, ku heta mirinê di oxira azadiyê de rawestiya, kesayetiyek pêgihîştî, tije dilsozî bo rêzên azadiya gelê Kurd û bi baweriyeke kûr a bi felsefeya azadiyê ya Rêber Apo bû. Astekî bilind di rêzên partiya me PJAK’ê de bi dest xist. Salên dirêj di nav gelê me de û li bajarên cuda ji bo xizmetkirina gel û berxwedana li hemberî zilm û zordariya Komara Îslamî ya Îranê, bi awayekî bê westan xebat meşand. Şehîd Gulperîpûr ku bi van çalakiyên xwe yên welatparêziyê Komara Îslamî ya Îranê hêrs kiribû, piştî demeke kurt di nav êşkenceyên giran û bi êş ên zindanê de, serî ji wî rejîmê re netewand û berxwedaneke bêhempa nîşan da. Vê pêngavê ew xiste ser rêza şehîdên zindanê û girêdayî siyaseta fikrî ya azadiyê ma, ku çareseriya pirsên gelê Kurd û azadiya gelane. Îro em destkeftiyên van çalakiyên têkoşeriyê bi çavên xwe dibînin.
Heval Reza Mamedî welatparêzekî rastîn bû ku bi exlaq, reftar û çalakiyên xwe yên rojane, rê ji bo ciwanên bi kelecan û dilsoz vekir; ew bû mînaka modelekî welatparêz ê têkoşer ku yekane armanca wî rizgarkirina gelê wî ji bin zilm û zordariya Komara Îslamî ya Îranê bû. Bi hilbijartina rêya azadiyê ya di jiyanê de, wî xwe bi pêş xist, bû mînak û beşdariyeke mezin û bi bandor di nava têkoşînê de kir.
Komiteya Şehîdên Partiya Jiyana Azad a Kurdistanê (PJAK) di 13’emîn salvegera darvekirina wan de bîranîna hevalên şehîd Hebîbila Gulperîpûr (Bahoz Sine) û Reza Mamedî bilind dinirxîne. Rêya têkoşîna hevalên şehîd Gulperîpûr û Mamedî rêya serkeftina têkoşîna me ye. Îro ji bo gihîştina gelê Kurd bi destkeftiyên hîn mezintir, pêngaveke mezin hatiye avêtin û pêwîste ciwanên azadîxwaz ên gelê me pêngavên xwe bi ser bixin, rêya têkoşîna hevalên mîna Gulperîpûr û Mamedî û rêya wan ronahî bikin. Bêguman armanca partiya me pêkanîna azadiya temame ji bo gelê Kurd li Rojhilatê Kurdistanê û Îranê; ev yek dê bibe sedema bi cih anîna xwestekên şehîdên civakê. Bîranîna tevahiya şehîdan cihê şanaziyê be.”
