Ji bo gerîlayê HPG’ê Hasan Opçîn (Çekdar Hanî) ku di 28’ê Gulana 2017’an de li Avaşînê şehîd bû li Mala Şînê ya Kubbeya Kesk a navçeya Peyas a Amedê sersaxî hat danîn. Gelek kes bi pêşengiya Komeleya Piştevanî û Alîkariyê ya bi Malbatên Xizmên Xwe li Dergûşa Şaristaniyê Winda Kirine re (MEBYA-DER) a Amedê serdana şînê kir. Di serdanê de dirûşmeya “Şehîd namirin” hat berzkirin.
Hevseroka MEBYA-DER’ê Gurbet Sevîktek Arî di sersaxiyê de axivî. Gurbet Sevîktek sersaxî ji malbatê re xwest û anî ziman ku ew ê têkoşîna xwe bidomînin.
Piştre, bi girseyî serdana sersaxiya gerîlayê HPG’ê Yûnûs Bîlgî (Zagros Serdar) ku di 26’ê Gulana 2017’an de li herêma Zapê ya Herêmên Parastinê yên Medyayê şehîd bû û li Mala Şînê ya Kiralan a li gundewarê Qilêdar ê Licê hatiye danîn, kir.
‘BI TÊKOŞÎNA XWE DI NAV ME DE NE’
Hevserokê MEBYA-DER’ê Ramazan Dengîz di sersaxiyê de axivî û got, “Her şehîdek windahiyek mezin e. Ji ber ku ew hemû şagirtên Abdullah Ocalan in. Dema ku wan dest bi vê têkoşînê kirin, wekî fedaî dest pê kirin. Şehîdên me pir bi qîmet in. Ew cewher in, mîna zêr in. Jibîrkirina wan û têkoşîna wan xiyanet e. Ew bi ruh û têkoşîna xwe di nav me de ne.”
