Çeteyên cîhadîst ên girêdayî Hikûmeta Veguhêz a Sûriyeyê û dewleta Tirk piştgiriyê dide wan, ev çend roj in bê navber her du taxên Kurdan ên li Helebê topbaran dikin, hedef digrin û di encama êrîşên çeteyan de bi dehan kes birîndar û şehîd bûne. Her wiha çete Nexweşxaneya Xalid Fecir jî hedef digirin ku tenê ew nexweşxane di xizmeta gelê her du taxan de ye. Çeteyan gelek caran ew kiriye hedefa xwe û li wir komkujiyek pêk anîne.
Bijîşkên Kobanê têkildarî êrîşên li ser Nexweşxaneya Xalid Fecirê yên çeteyên girêdayî Hikûmeta Veguhêz a Sûriyeyê û dewleta Tirk piştgiriyê dide wan ji ANF’ê re axivîn û êrîş şermezar kirin.
Bijîşk Hikmet Ehmed di destpêka axaftina xwe de diyar kir ku ew van êrîşan û bi taybet jî yên li ser nexweşxaneyan şermezar dikin û ev yek anîn ziman: ‘’Gelê me tê hedefgirtin û komkujî tên kirin. Van çeteyan li Siwêdayê, Ceremanê û li gelek nexweşxaneyên din jî li ser gelan komkujî pêk anîn. Îro dîsa jiyana hemû kesên li wê nexweşxaneyê dimînin û tedawî dibin, di xeteriyeke gelekî mezin de ye. Em bang li Xaça Sor û Heyva Sor ya navdewletî dikin ku demildest bikevin tevgerê. Divê korîdoreke însanî bê vekirin û ev birîndar jî ji wir werin derxistin. Divê êdî bijîşk neyên hedefgirtin ji ber ku hedefgirtina bijîşk û nexweşxaneyan li dijî pîvanên mirovahiyê ye.”
Hemşîre Mazlûm Ehmed li hemberî êrîşên çeteyan ên li ser Nexweşxaneya Xalid Fecirê nerazîbûnên xwe anîn ziman û got: ‘’Her ku diçe êrîş girantir dibin. Çete nexweşxaneyan hedef digirin. Tevî hemû bêderfetiyan jî nexweşxane li ber xwe dide û birîndaran tedawî dike. Tevî ku li gorî qanûnên cîhanî ev êrîş qedexe ne jî çete dîsa êrîş dikin. Em jî weke Tîma Tenduristiyê ya Kobanê van êrîşên çeteyan ên li ser gelê me şermezar dikin û diyar dikin ku em amade ne demildest berê xwe bidin taxên Şêxmeqsûd û Eşrefiyê. Her wiha divê êdî demildest hemû cîhan raber ser piyan. Niha li ser gelê Kurd komkujiyek pêk tê.’’
