Cenazeyê şervanê QSD’ê Xebat Baz (Welat Xalid) 13’ê Çileya 2025’an de di berxwdana Bendava Tişrînê de şehîd bûbû, îro bi merasîmeke girseyê li Pakrewangeha Şehîdan a Tebqayê hat veşartin. Bi sedan şêniyên kantona Tebqayê û koçberên ji Efrîn û Şehbayê, endam û rêveberên desteyên Rêveberiya Xweser a Kantona Tebqayê, Meclisa Kantona Efrîn-Şehbayê, partiyên siyasî, fermandar û şervanên Meclisa Leşkerî ya Tebqayê, Hêzên Ewlekariya Hundirîn, şêx û rûspiyên eşîran beşdarî merasîmê bûn.
Merasîm bi deqeya rêzgirtin û torena leşkerî destpê kir. Piştre endamê Meclisa Malbatên Şehîdan Xelîl Îsa axivî û diyar kir ku bi ked û fedakariyên şehîdan serkeftin hatin afirandin û destkeftî hatin bidestxistin. Îsa da zanîn ku şehîdan îlhama biryardarî û berxwedana li hemberî hemû êriş û komployan da gelên azad.
Ji fermandarên hêzên leşkerî Kemal Efrîn axivî û soza domandina rêya şehîdan da.
Apê şehîd Xebat, Heqî Xalid jî got: “Şehîd Xebat xeyalê xwe yê rakirina çeka apê xwe bi cih anî û da ser rêya wî ya parastina gelê xwe.”
Xalid anî ziman ku herêm bi xwîna şehîdan rizgar bûne û wiha dawî li axaftina xwe anî, “Em nehêlin dijmin destdirêjî erdê me bike. Em ê bersivên xurt bidin kesên hewl bidin ewlehiya herêmên me têk bibin.”
Piştî axaftinan nasnameya şehîd Xebat hat xwendin û radestî malbata wî hat kirin. Hevreyên şehîd cenaze rakir ser milê xwe û bi dirûşme û tilîliyên dayikan spart axê.
