Ji ber sêyemîn salvegera erdhejên 6’ê Sibatê yên 2023’yan ku navenda wan Mereş bû û bandor li 11 bajaran kiribû, li gelek bajaran ji aliyê platform û hêzên ked, aştî û demokrasiyê ve çalakiyên bîranînê û daxuyaniyên çapemeniyê hatin lidarxistin.
STENBOL
Hêzên Ked, Aştî û Demokrasiyê yên Stenbolê, li Meydana Îskelê ya Kadikoyê daxuyaniyek dan çapemeniyê. Di çalakiyê de ku gelek kes tevli bûn, pankartên bi nivîsa “Ne Erdhejê, Pergala Rantxwaz Kuşt! Piştgirî Berdewam Dike” û “Me Erdheja 6’ê Sibatê Ji Bîr Nekir” hatin vekirin. Di daxuyaniyê de pirî caran dirûşmên “Erdhejê ji bîr nekin, nede bîrkirin” û “Ji bîrkirin tune, efûkirin tune, helalkirin tune” hatin berz kirin.
Daxuyanî li ser navê Lijneya Koordînasyona Bajêr a Stenbolê ya TMMOB’ê ji aliyê Aydan Adanir Usta ve hate xwendin. Usta diyar kir ku bandorên windahî û hilweşîna di erdhejê de hîn jî berdewam dikin û destnîşan kir ku zafiyetên di pêvajoya birêvebirina karesatê de derketine holê, ji roja yekem ve pirsgirêk hîn mezintir kirine.
MÊRDÎN
Platforma Ked û Demokrasiyê ya Mêrdînê, li Parka Rêyên Bejayî ya navçeya Artukluyê hatin bal hev. Di bîranînê de Parlamentera DEM Partiyê ya Mêrdînê Beritan Guneş Altın û Parlamenterê Partiya DEVA yê Mêrsînê Mehmet Emin Erkmen jî amade bûn. Daxuyanî li ser navê platformê ji aliyê Hevberdevka TMMOB’ê ya Bajêr Rabia Daş ve hate xwendin.
Rabia Daş anî ziman ku ew ê li dijî pergala rantê, bêcezatiyê û li dijî radestkirina xizmetên giştî ji bo piyaseyê têkoşîna xwe berdewam bikin. Daş got: “Ne erdhejê, îhmalkariyê kuşt. Divê berpirsiyarên rastîn hesab bidin.”
Parlamentera DEM Partiyê Beritan Guneş Altın jî diyar kir ku dewletê piştî erdhejê li herêmê bi qasî pêwîst hebûna xwe nîşan nedaye û bal kişand ser mijara zarokên winda; destnîşan kir ku hîn jî nayê zanîn ka çend zarok winda ne.
RIHA
Platforma Ked û Demokrasiyê ya Rihayê jî li Novada Parkê daxuyaniyek da. Di daxuyaniyê de ku Parlamentera DEM Partiyê ya Rihayê Dilan Kunt jî beşdar bû, pankarta “Me ji bîr nekir, ne karesat lê îhmalkarî dikuje” hate hildan.
Li ser navê platformê Firat Doğan axivî û got ku di erdhejan de bi sed hezaran kesan jiyana xwe ji dest dane û birîndar bûne, bi milyonan mirov jî neçar mane koç bikin. Doğan diyar kir ku ev hilweşîn encama polîtîkayên li ser bingeha rantê ne û tevî ku sê sal derbas bûne jî, berpirsiyar nehatine darizandin.
