Ji bo şervanê Hêzên Sûriyeya Demokratîk (QSD) Ferhad Parlak (Cîger Başkale) ku 15’ê Tîrmehê li gundê Ebû Sirê yê girêdayî Kobanê-Çelebiyê şehîd bibû, ji bo gerîlaya YJA-Starê Sûltan Nîlî (Asmîn Ardil Dijwar) ku 18’ê Gulanê di encama qezayekê de şehîd bibû û ji bo gerîlayê HPG’ê Îlyas Bînbîrdag (Berbang Çiyager) ku Çileya 2018’an şehîd bibû li Wanê konên sersaxî hatin danîn.
Endamên MEBYA-DER’ê, endamên Koordînasyona Saziyên Demokratîk, rêveberên DBP’ê û DEM Partiyê û gelek kesên din çûn serdana konên sersaxiyê.
Girse ewil çû serdana kona sersaxiyê ku li Taxa Şafakê ya navçeya Riya Armûşê ji bo Sûltan Nîlî hatibû danîn. Girse li mala şînê bi dirûşma ‘Şehîd Namirin’ sersaxî ji malbatê re xwest.
Piştre jî girse çû serdana kona sersaxiyê ya ji bo Ferhad Parlak ku li Taxa Altintepe ya li navçeya Tûşbayê hatibû danîn. Girseyê li vir jî bi dirûşmeyan berê xwe dan konê sersaxiyê.
Girseyê di dawiyê de tevlî mewlûda ku ji bo İlyas Bînbîrdag a li navçeya Serayê hatibû lidar xistin bû.
