Heyva Sor a Kurd têkildarî rewşa niha ya Siwêdayê civînek çapemeniyê li dar xist. Di civînê de Heyva Sor a Kurd raporek der barê rewşa Siwêdayê de parve kir. Di raporê de agahî xwe dispêrin şahidên ji Siwêdayê yên piştî êrîşên hikumeta veguhêz a Sûriyeyê binpêkirin li dijî wan hatin kirin. Hate diyarkirin, şahidan destnîşan kir ku komkujiyên ku hikumetê pêk anîne, li ser esasê mezhebî hatin kirin. Her wiha îşaret bi wêrankirina nexweşxane, mal û cihên olî hat kirin.
Civîna çapemeniyê li pêşiya Navenda Heyva Sor a Kurd a li bajarê Qamişloyê pêk hat. Gelek ragihandinên herêmî û navneteweyî amade bûn.
Hevserokê Heyva Sor a Kurd Dilgeş Îsa di civîna çapemeniyê de bal kişand ser rewşa mirovî û jiyanî ya li bajarê Siwêdayê û diyar kir ku pêdiviya Siwêdayê bi alîkariya lezgîn heye. Dilgeş Îsa got: “Li ku derê li ser erdîngariya Sûriyeyê be kengî alîkarî ji me were xwest em ê erka xwe ya mirovî bi cih bînin.”
Îsa bal kişand ser komkujiyên ku ji destpêka Tîrmeha 2025’an ve li Siwêdayê hatine kirin û bi bîr xist ku hejmareke mezin a sivîlan ji malên xwe hatine koçberkirin û li dijî nêzî 36 gundên li rojavayê Siwêdayê êrîş hatin kirin.
Îsa got: “Me hewl da bi awayekî lezgîn alîkariyan bighînin koçberan, lê em bi zehmetiyên mezin re rû bi rû man.”
Dilgeş Îsa bi domdarî got: “Ji rojên destpêkê yên êrişên li ser Siwêdayê ve, Heyva Sor a Kurd dest bi avakirina kanalan bi Şamê re kir da ku alîkariyan bighîne Siwêdayê.”
Îsa îşaret pê kir ku herî zêde jin û zarok ji ber êrîşan zerar dîtin û wiha domand “Piştî ku şer dest pê kir me xwe gihand rêxistinên sivîl ên li Siwêdayê û bangawazî li ajansên Neteweyên Yekbûyî kir da ku mekanîzma gihandina alîkariyan peyda bikin. Me li Bakur û Rojhilatê Sûriyeyê pêngavên komkirina alîkariyan bi hevkariya rêxistinên sivîl û Rêveberiya Xweseriya Demokratîk li dar xistin. Bi hevkariya hin rêxistinên li wir me karîbûn hin alîkariyên diravî bişînin.”
Dilgeş Îsa destnîşan kir ku qutbûna înternetê û nebûna kanalên ragihandinê yên rasterast ji bo wan astengiyeke din çêkiriye û got: “Me hewl da bi rêya Heyva Sor derman û xwarinê bighînin wir, lê ev yek çêbûne. Heyva Sor a Ereb jî nekarî tu cure alîkariyê pêşkêş bike.”
Îsa da zanîn ku niha jî Siwêdayê di bin ambargoyeke giran de ye û wiha pê de çû: “Rê bi temamî ne qutkirî ne, lê wekî ku kel û pel ji welatekî derbasî welatekî din dibin, dixebite, di derbaskirina xwarin û sotmeniyê de zehmetiyên mezin hene. Kel û pelên ku bi rêya bazirganan derbas dibin pir buha ne.
Îsa îşaret pê kir ku ajansên NY’yê bi rêya Heyva Sor a Erebî beşek ji alîkariyan gihand Siwêdayê, lê pir kêm e û pêdiviya firinan a ji ard bi cih nayîne.
Di civîna çapemeniyê de derbarê alîkariyên ku Heyva Sor a Kurd pêşkêşî Siwêdayê hatî kirin de Hevseroka Heyva Sor a Kurd Hediye Abdullah axivî û wiha got: “Em gelek ji rewşa Siwêdayê bandor bûn. Me gelek hewldan kirin da ku em alîkariya mirovî bigîhinin gelê Siwêdayê. Destpêka me xwest
em alîkariya cotkaran bikin, da ku çandiniya wan nesekine, me ji wan re mazot peyda kir da ku bexçeyên xwe av bidin û ji bo karîbin wan gelan bigihînin cihek bi tendurist û parastinê.’’
Hediye Abdullah diyar kir ku Heyva Sor a Kurd di dema êrîşan de sotemenî ji bo ambulansê peyda kir da ku birîndar û qurbaniyan bighînin navendên tenduristiyê.
Her wiha da zanîn ku wan alîkarî pêşkêşî 10 malbatên ku rewşa wan a debarê pir giran e û 3 di dema dawî de 3 hezar paketên xwarinê belav kirin.
Hediya Abdullah têkildarî rewşa tenduristiyê de got “Me xwe gihand Navenda Emel ku xizmeta nexweşên penceşêrê dike, hezar û 500 nexweşên penceşêrê li wê derê tedawiya xwe dibîne, Heyva Sor a Kurd ji wan re tedawiyên pêwîst peyda kir. Heta niha jî alîkariyên me ji bo Navenda Emel didome. Gelek sazî û cihên ku xizmeta tendurstî û xizmeta avê dide, mazot li ser wan hatiye qût kirin, me li gel Rêxistina Sened nêzî 300 tabloyên enerjiya tavê pêşkêş kir. Têkiliyên me bi kesên li Siwêdayê ne re heye, Nexweşaxaneyek li wir 510 karmendên wê hene, ev çend meh e fonê xwe ne girtine, bi awayek alîkarî, em pêre bûn alîkar, em ê vê xizmetê bidomînin.”
