Navenda Ragihandin û Çapemeniyê ya HPG’ê (HPG-NRÇ) derbarê gerîlayê şehîd ev agahî parve kirin:
“Em hevrêyê xwe Botyan Amed bi rêzdarî û minetdarî bi bîr tînin ku 23’yê Tebaxa 2019’an dema li Qada Dersimê li ser wezîfeya xwe di êrîşa dijmin de tevlî karwanê şehîdan bû.
Hevrêyê me li Bakurê Kurdistanê ji bo bibe layiqê şehîdan gelek wezîfeyên zehmet bi cih anî. Bi hevrêtiya xwe ya kûr, tevlîbûna xwe ya dirûst û sekna xwe ya zelal a li ser xeta Apoyî milîtanek mînak bû. Ji bo bi ser xistina têkoşîna me û parastina destkeftiyên gelê me, li Bakurê Kurdistanê bi îradeyeke mezin gerîlatiyeke xurt kir û îspat kir ku xwedî karakterekî welê ye ku têk naçe. Hevrêyê me Botyan bi fedakariyeke mezin li dijî her cure zehmetiyê rabû û ji bo parastina hebûn û azadiya gelê me, weke yek ji lehengên fedayî navê xwe li dîroka me ya têkoşînê nivîsand. Hevrêyê me Botyan têkoşîna xwe ya bi coş, kelecan û hezkirina azadiyê destpê kirî, di lûtkeyê de temam kir. Em soza xwe dubare dikin ku bîranîna wî her tim bidim jiyîn û ala têkoşînê ya ku dewrî me kirî, bi serketinê tacîdar bikin.
Weke hevrêyên wî, di serî de malbata hêja ya hevrê Botyan em ji hemû gelê Kurdistanê yê welatparêz re sersaxiyê dixwazin û soza xwe dubare dikin ku bîranînên şehîdên xwe yên leheng timî bidin jiyîn.
Agahiyên derbarê nasnameya hevrêyê me yê şehîd Botyan Amed bi vî rengî ne:
|
|
Nasnav: Botyan Amed |
Hevrêyê me Botyan weke ferdê malbatek welatparêz li navçeya Dara Hênî ya Çewlîkê hate dinê. Ji ber ku malbata wî û xizmên wî yên nêz di nava têkoşînê de bûn û xwedî li nirxên Kurdîtiyê derketin, ew jî girêdayî cewherê xwe mezin bû. Lewma di temenek biçûk de PKK nas kir. Mîna her zarokek Kurd ê li Kurdistanê dijî rastiya dijmin yekser jiyan kir û nas kir, dagirkerî û mêtingeriya dijmin a li Kurdistanê ti carî qebûl nekir. Li hemberî qirkirin, zext, êşkence û komkujiyên ku dijmin her roj bi rengekî sîstematîk li dijî gelê me pêk anî, bû xwedî hêrseke mezin. Hevrêyê me Botyan ji ber ku li herêmeke mîna Çewlîk a bi welatparêziya xwe ya kûr tê naskirin ji dayik bû û mezin bû, derfet dît ku PKK’ê ji nêz ve nas bike. Bi taybetî bi tevlîbûna keçxaletên wî ya nava refên gerîla re, rastiya Kurdistanê hîn zêdetir fêm kir. Ev geşedan ji bo hevrêyê me Botyan bûn xala werçerxê. Hevrêyê me fêm kir ku eger armancek jiyanê hebe divê bi wate be, ji bo vê ket nava lêgerînê. Hevrêyê me ferq kir ku kesekî ku gelê wî/ê tê qirkirin, bi tena serê xwe nikare azad bibe. Ji bo bi têkoşîna azadiyê ya gelê me re bibe yek, tevlî xebatên ciwanên welatparêz û şoreşger bû. Weke ciwanek Kurd dizanî ku divê berpirsyariyên xwe yên li hemberî gelê me bi cih bîne û bi rengekî aktîf xebat meşandin. Ji bo li ser bingehê xweparastinê bersiva êrîşên li hemberî gelê me bide, ket nava hewldanek zêde. Hevrêyê me Botyan bi cesaret û bandora hevrêyên xwe, derket pêş. Bi taybetî êrîşên çeteyên DAÎŞ’ê yên li dijî Kobanê, komkujiyên li wir pêk anîn û piştgiriya dewleta Tirk a ji bo van êrîşên dermirovî, ji bo hevrêyê me Botyan bû xala dawî. Gelê me li dijî êrîşên çeteyên DAÎŞ’ê, li gelek bajarên Kurdistanê rabû serhildanê û dewleta Tirk jî li hemberî gelê me ket hewldana komkujiyên nû. Vê yekê hêrsa hevrêyê me Botyan hîn zêdetir kir. Hevrêyê me fikirî ku li dijî van êrîşên dijmin, wê li çiyayên Kurdistanê bibe gerîla û bi vî rengî bersiva herî baş bide dijmin. Li ser vî bingehî berê xwe da çiyayên azadiyê û tevlî nava refên gerîla bû.
Hevrêyê me Botyan dema cara ewilî bi gerîlayan re hat ba hev, pir bi kelecan bû. Ji peywendiyên hevrêtiyê yên gerîlayan pir bandor bû. Fikirî ku divê teqez ew jî bibe gerîlayekî wiha bi bandor û bi heybet, ji kêliya destpêkê ve hewldanek mezin raber kir. Dema perwerdeya şervanên nû dît, ji jiyana gerîla û çiya coş û tameke mezin girt. Bi taybetî ji taybetmendiyên hevrêyên xwe yên dirûst, parvekar û rexneyî bandor bû. Lewma bi rengekî bêhesab tevlî jiyanê bû û ket nava lêgerîn û hewldanê ku van taybetmendiyên dilnizm di xwe de ava bike. Hevrêyê me Botyan bi keda xwe teqdîra hevrêyên xwe qezenc kir û tevlîbûna xwe hîn mezintir kir. Hevrêyê me bi perwerdeyên îdeolojîk xwe di felsefeya azadiyê ya Rêber Apo de kûr kir û di kesayeta xwe de guhertin û veguhertinên girîng pêk anî. Bi taybetî jî li hemberî pergala kapîtalîst ku ciwanan ji cewhera wan dûr dixe û ji bo ku wan bike amûr di kesayeta wan de hin taybetmendiyan diafirîne, kete nava şerekî dijwar û karî yek bi yek xwe ji van rizgar bike. Dîsa haya hevrêyê me ji nêzîkatiyên pergale mêran a serdest a ku jinan weke obje û koleyan dibîne, çêdibe û girêdayî vê yekê xwe ji kêmasiyên ku di nava pergalê de lê rast tê, rizgar dike û karî prensîbên azadiyê di kesayeta xwe de bide afirandin. Hevrêyê ne Botyan ê ku weke ciwanekî li Amedê mezin dibe û rastiya dijmin baş nas dike, di wê baweriyê de bû ku dijmin tu caran dev ji siyaseta xwe tunekirinê ya li ser gelê me bernade. Ji ber vê yekê biryarê dide ku divê parastina gelê me bi awayê herî xurt were kirin. Girêdayî van yekan giramiyeke mezin dide dersên leşkerî û ji bo ku xwe di terz û taktîkên gerîlayan de gelekî pêş bixe, kedeke bêhempa nîşan da. Li gel ked û hewla xwe ji aliyê hemû hevalên xwe ve gelekî tê hezkirin û karî ji wan re bibe gerîlayekî mînak.
Hevrêyê me Botyan ê ku piştî kperwerdeyên xwe temam dike li herêma Zapê demekê beşdarî xebatan dibe, xwest têkoşîna xwe li qadên herî dijwar bidomîne. Hevrêyê me yê ku di vêmijarê de gelekî bi biryar e, bi taybetî jî derbasî Bakurê Kurdistanê dibe û dixwaze ji êrîşên tunekirinê yên dewleta Tirk ên li ser gelê me tolê hilîne. Hevrêyê me yê ku bi vê hewl û sekna xwe baweriyeke mezin dide hevrêyên xwe, ji bo ku xwe di taktîkên gerîlayan de gelekî bi pêş ve bibe beşdarî perwerdeyên leşkerî dibe. Hevrêyê me yê ku di vê pêvajoya perwerdeyê de bi kûrbûn, ked û hewla xwe di warê gerîlabûnê de tecrûbeyên mezin bi dest dixe, xwe ji bo gerîlatiya li Bakur amade dike.
Hevrêyê me Botyan ê ku di sala 2016’an de berê xwe dide Bakurê Kurdistanê, tevî ku gelekî dixwest derbasî Eyaleta Amedê bibe jî ji ber hewcehiyan derbasî Eyaleta Erziromê dibe. Ji ber helwest û sekna wî ya milîtanî ya têkildarî vê mijarê hevrêyên wî rêzeke mezinlê digirin. Hevrêyê me yê ku dixwaze di pêvajoya ku li Bakurê Kurdistanê derfetên têkoşînê gelekî kêm in û şert û mer dijwar in de şoreşgertiyê bike, bi vê helwesta hem ji hevrêyên xwe re û hem jî ji ciwanên Kurd re dibe milîtanekî fedaî yê Apoyî yê mînak. Hevrêyê me yê ku dema li Erziromê dimîne tim di nava hewl û lêgerînên derblêxistina dijmin de ye, bi vê sekna xwe ji hevrêyên xwe re dibe çavkaniya hêz û moralê. Hevrêyê me bi enerjiya xwe ya ciwantiyê, hêrsa xwe a li hemberî dijmin û xîreta xwe ya têkoşînê di demeke kurt de gelekî tecrûbeyan bi dest dixe. Hevrêyê me yê ku piştî demekê li Erziromê dimîne û piştre derbasî Dersimê dibe, heman tempoya têkoşînê li wir jî nîşan dide. Hevrêyê me yê ku haya wî ji têkoşîna me ya azadiya Dersimê û girîngiya wê ya dîrokî ya ji bo gelê me heye, dizanî ku divê têkoşîna li vir zêdetir were mezinkirin û di vê çarçoveyê de tev geriya. Hevrêyê me yê ku tim bi hevrêyên xwe re nîqaşa vê yekê dikir û ramanên xwe li gel wan parve dikir, ji bo fikir, xwestek û çalakiyên xwe pêk bîne bi performanseke mezin têkoşiya.
Hevrêyê me Botyan ê ku di 23’yê Tebaxa 2019’an de li Dersimê di encama êrîşeke dijmin de tevlî karwanê nemiran dibe; wê bi kesayeta xwe ya jidil, durist û sade û dilsoziya xwe ya bêhesab a ji bo nirxên xwe û hêrsa xwe ya li hemberî dijmin a kûr tim di nava têkoşîna me de bijî û wê bibe meşaleyeke ku rêya têkoşîna me ronî dike. Di şexsê hevrêyê me Botyan de em soza xwe dubare dikin ku em ê xeyalên hemû şehîdên xwe pêk bînin.’’
