Însiyatîfa Parêzerên Sûriyeyê di çarçoveya Hefteya Mafên Mirovan de name ji Sekreterê Giştî yê Neteweyên Yekbûyî (NY) Antonio Guterres re şand û xwest ku ji bo azadiya fîzîkî ya Rêber Apo gav were avêtin.
Di nameyê de biryara Dadgeha Mafên Mirovan a Ewropayê (DMME) ya têkildarî binpêkirina “mafê hêviyê” hate bibîrxistin û hate diyarkirin ku divê azadiya fîzîkî ya Rêber Apo bi hiqûqa navneteweyî were mîsogerkirin.
Însiyatîfê destnîşan kir ku Rêber Apo 27’ê Sibatê banga Aştî û Civaka Demokratîk kir, ji bo lihevkirinê gavên pratîk avêt û ragihand ku azadiya Rêber Apo li gorî biryara DMME’yê ya 18’ê Adara 2014’an mafekî qanûnî ye.
Însiyatîfê anî ziman ku azadiya fîzîkî ya Rêber Apo “mafekî hêviyê” yê weke mafekî navneteweyî hatî mîsogerkirin e û ev yek daxwaza edaletê ya bi milyonan Kurdan nîşan dide. Însiyatîfê bang li NY’ê kir ku dewletên endam teşwîq bike ku biryarên dadgehê pêk bînin û pêvajoya aştiyê xurt bikin.
