Serokwezîra Ûkraynayê Ioulina Svyrydenko li ser Telegramê daxuyaniyek da û got, “Di encama êrîşa dijmin de banê avahiya hikumetê û qatên jorîn zerar dîtin. Tîmên rizgarkirinê hewl didin şewatê vemirînin.”
Di êrîşên li Kîevê de kesekî jiyana xwe ji dest da, 18 kes jî birîndar bûn. Rayedaran diyar kirin ku Rûsyayê bi balafirên bêmirov li bajêr êrîşeke giran kir.
Li herêma Sûmi ya li bakurrojhilat jî di êrîşeke din a Rûsyayê de kesek mir, zarokekî 9 salî jî di nav de gelek kes birîndar bûn. Hate ragihandin ku li herêmên Zaporijya û Kryvyi Rih jî di encama bombardûmê de gelek mirov birîndar bûn.
Di ser dagirkeriya Rûsyayê ya li Ûkraynayê re zêdeyî sê sal derbas bûn. Hêzên Kremlînê hîn jî ji sedî 20 ê xaka Ûkraynayê kontrol dikin. Li aliyê din hewldanên dîplomatîk ên hefteyên dawî bi pêşengiya Serokê DYE’yê Donald Trump hatin destpêkirin, bê encam man.
