Di bernameyên ku li gelek bajaran hatin lidarxistin de, welatiyan bi meş, axaftin û govendan agirê Newrozê vêxistin di pîrozbahiyan de banga aştî, demokrasî û wekheviyê hate kirin.
Bi dirûşmên “Newroza Azadî û Yekitiya Demokratîk”, “Newroza azadî û demokrasiyê” li gelek cihan agirê Newrozê hat vêxistim.
ENQERE
Hêzên Ked û Demokrasiyê yên Mamakê, li navçeya Mamaka Enqereyê bernameyeke Newrozê li dar xistin. Bername ji Parka Haci Bektaşi Veli dest pê kir û girseyê bi dirûşman ve ber bi Qada Tuzluçayirê ve meşiya. Gelek partiyên siyasî û rêxistinên kedê beşdarî meşê bûn. Di meşê de pankarta “Li dijî êrişkarî û dagirkeriya emperyalîst, em agirê azadî û demokrasiyê geş bikin” hat hilgirtin. Di meşê de bi domdarî dirûşmên “Bijî Newroz, Newroz pîroz be”, “Li hundir û li derve tecrîdê parçe bike” û “Kurdistan goristan ji bo faşistan” hatin berzkirin.
Tevî baranê jî gel li ber agirê Newrozê strî govend gerand.
ÎZMÎR
Rêxistina DEM Partiyê ya navçeya Seferîhîsarê, li Qada Cumhuriyetê tevlîbûna Parlementera DEM Partiyê ya Îzmîrê, gelek welatiyan û nûnerên saziyên sivîl agirê Newrozê hat geş kirin. Pîrozbahî bi deqeyek rêzgirtinê dest pê kir û di dema bernameyê de dirûşmên wekî “Jin, Jiyan, Azadî”, “Bijî berxwedana Rojava” û “Newroz pîroz be” hatin berzkirin.
Li ser navê rêxistina navçeyê, endamê DEM Partiyê Enbiya Şahîn metna çapemeniyê xwend. Şahîn diyar kir ku divê îsal agirê Newrozê li dijî şer bibe dengê aştiyê û got: “Ev agir divê li dijî zilmê bibe daxwaza azadiyê, li dijî xizaniyê bibe jiyaneke birûmet û li dijî komkujiyên jin û zarokan bibe bersiv. Newroz wekî bi hezaran salan, îro jî sembola biratî û wekheviya gelan e. Em bang li jin, ciwan û kedkaran dikin ku li qadên Newrozê bibin yek û têkoşîna demokrasiyê mezin bikin.”
‘PEYAMA RÊZDAR OCALAN RÊYA JIYANA HEVPAR NÎŞAN DIDE’
Piştî daxuyaniyê, Parlamentera DEM Partiyê Burcugul Çubuk axivî. Burcugul Çubuk bi bîranîna Rehşan, Zekiye û her sê darikên kibrîtê yên li Zindana Amedê dest bi axaftina xwe kir û destnîşan kir ku bedelên ji bo Newrozê hatine dayîn qet nayên jibîrkirin û got:”Îradeya me, îradeya aştiyeke birûmet e. Em ji bo aştiyekê derketine rê ku tê de mafê kedkar, jin û her kesî hebe. Îro li Newroza Amedê peyama rêzdar Ocalan hat xwendin. Di wê peyamê de bi awayekî pir zelal hat ravekirin ka jiyana hevpar çawa pêkan e. Em li Tirkiye û Kurdistanê, bêyî ku dest ji mafê zimanê dayikê û statuya Kurdistanê berdin, ji bo avakirina aştiyeke bi rûmet têdikoşin.”
Burcugul Çubuk herî dawî bang li gel kir ku sibe li Newroza Îzmîrê bi hêzeke mezintir kom bibin û agirê azadiyê bi hev re geş bikin.
Pîrozbahî bi gerandina govendê û bi tîlîliyan bi dawî bû.
MANÎSA
Rêxistinên Partiya Wekhevî û Demokrasiyê ya Gelan (DEM Parti) ên Salîhlî, Turgutlu û Alaşehîrê, pîrozbahiyên Newrozê li dar xistin. Hejmareke zêde ya welatiyan beşdarî pîrozbahiyên bi coş bûn. Di pîrozbahiyan de bi domdarî dirûşmeyên “Jin, jiyan, azadî”, “Bijî Serok Apo” û “Newroz pîroz be” hatin qêrîn.
Rêxistina DEM Partiyê ya Turgutluyê li Qada Newrozê ya Kolana Set Ustu daxuyaniyek da û Parlamenterê Bedlîsê yê DEM Partiyê Huseyîn Olan beşdarî daxuyaniyê bû. Huseyîn Olan di pîrozbahiyê de axivî û diyar kir ku Newroz ji bo gelên Kurdistan û Rojhilata Navîn xwedî wateyeke mezin e û wiha got: “Îro em Newroza azadî û yekitiya demokratîk pîroz dikin. Birêz Ocalan ji Girava Îmraliyê Newroza gelê Kurd pîroz kir. Divê gelê Kurd hîn bêtir xwedî li vê Newrozê derkeve. Peyama Birêz Ocalan ev bû: Xwedî li hebûna xwe û Newroza azadî û yekitiya demokratîk derkevin.”
Pîrozbahî bi govendên bi coş û dirûşman ve bi dawî bû.
ALAŞEHÎR
Pîrozbahiya Newroza ku ji aliyê Rêxistina DEM Partiyê ya Alaşehîrê ve li Bazara Taxa Yeni Mahalle hat pîrozkirin. Nivîskar Ahmedê Bilokî û endamên Meclisa Partiyê (PM) ya DEM Partiyê Besriye Tekgur û Aydin Çetînkaya jî beşdarî Newrozê bûn. Li vir Ahmedê Bilokî axivî û Newroza hemû gelê Kurd pîroz kir û got: “Ji Alaşehîrê heta Amedê em silavên xwe ji hemû gelê xwe re dişînin. Ev bajarê ku em lê Newrozê pîroz dikin, warê Kenan Evren bû. Kenan Evren li zindana Amedê îşkence li zarokên gelê Kurd dikir. Lê îro em li vir Newrozê pîroz dikin. Ev yek bi saya Rêber Apo pêk hat.”
Pîrozbahiya Newrozê bi gerandina govendê bi dawî bû.
SALÎHLÎ
Newroza ku ji aliyê Rêxistina DEM Partiyê ya Salîhliyê ve li Qada Newrozê ya Taxa Gaffar Okan hat pîrozkirin, bi beşdariya gelek welatiyan derbas bû. Di Newrozê de Koma Çiya û hunermendên herêmî derketin ser dikê û govendên bi coş hatin gerandin. Pîrozbahî bi dirûşman ve bi dawî bû.
