Li gelek bajarên Tirkiyeyê êrîşên çeteyên girêdayî hikûmeta demkî ya Sûriyeyê yên di bin kontrola dewleta Tirk de ne, yên li ser taxên Şêxmeqsûd, Eşrefiyê û Benî Zêd ên Helebê hatin protestokirin. Bi hezaran kesan daxwaza rawestandina tavilê ya êrîşên li ser Şêxmeqsûd û Eşrefiyê kirin.
HATAY
Partiya Wekhevî û Demokrasiyê ya Gelan (DEM Partî) ya Îskenderûnê bi daxuyaniya çapemeniyê bertek nîşanî êrîşan da. Hevseroka DEM Partiyê Fîdan Dûrmûş daxuyaniya çapemeniyê xwend û diyar kir ku taxên kurdan ên li Helebê bi tank, top, obus û dronan hedef tên girtin û êrîşan wekî komkujiyek eşkere bi nav kir. Fîdan Dûrmûş daxwaza rawestandina tavilê ya êrîşan, darizandina berpirsiyaran û garantîkirina ewlehiya gel kir.
EDENE
Pêkhateyên Platforma Saziyên Demokratîk a Edeneyê bi beşdariya sedan kesî li bajêr meşek li dar xist. Di meê de pankarta “Rojava xeta me ya sor e” û flamayên kesk, sor û zer hilgirtin. Girseya ku li Taxa Ova ya navçeya Seyhanê kom bû, ber bi herêma Pîşesaziya Metal a Şakirpaşa ya li taxa Onurê ve meşiya.
Di meşê de dirûşmeyên “Rojava, Rojhilatê Kurdistanê yek parçe ye”, “Gelê Kurd ranezê Rojava biparêzin”, “Bijî Serok Apo”, “Bijî berxwedana QSD”, û “Gelê Rojava ne bi tenê ye” hatin berzkirin. Welatiyên derdorê bi çepikan û nîşaneya serketinê piştgirî dan meşê.
Piştî deqeyek rêzgirtin û xwendina sirûdê, endama Meclisa Ciwanan a DEM Partiyê ya Edeneyê Tûba Tûnç daxuyaniya çapemeniyê ya hevpar xwend. Tûba Tûnç diyar kir ku Şêxmeqsûd û Eşrefiyê di bin dorpêçê de ne û bang li hêzên navneteweyî kir ku tavilê berpirsiyariya parastina sivîlan bigirin ser xwe.
MÊRSÎN
Bi hezaran kes beşdarî meşa ku ji hêla Platforma Saziyên Demokratîk a Mêrsînê ve hate organîzekirin, bûn. Di meşê de pankarta “Rojava wijdan e, berxwedan e, azadî ye. Nayê teslîmkirin” hatibû vekirin. Meş ji Parka Bariş a navçeya Akdenizê dest pê kir û heta ber avahiya DEM Partiyê berdewam kir. Di meşê de dirûşmeyên “Bijî berxwedana Rojava” û “Bê Serok jiyan nabe” hatin berzkirin.
Berdevka Meclîsa Dayikên Aştiyê ya Mersînê Emîne Eren di daxuyaniyê de axivî û êrîşên hêzên girêdayî HTŞ’ê şermezar kir û banga piştgiriya berxwedanê kir.
Hevserokê DEM Partiyê yê Mêrsînê Reşat Aşan diyar kir ku êrîşên li dijî Kurdên li Helebê hewldanek qirkirinê ye û gel û ciwanên ku li Rojava li dijî çeteyan li ber xwe didin silav kir.
Parlamenterê DEM Partiyê yê Mersînê Alî Bozan jî bêdengiya civaka navneteweyî rexne kir û diyar kir ku Kurdên sivîlên dibin hedef. Bozan anî ziman ku heta ku êrîş rawestin wê têkoşîna xwe bidomînin.
Daxuyanî bi berzkirina dirûşm û çepikan bi dawî bûn.
