Li Girtîgeha Girtî ya Tîpa F a Boluyê, berdana Aydin Adîyaman û Elî Mûrad Çelîk, tevî ku dema înfazên wan temam bûye jî, ji aliyê Desteya Karêgiriyê û Çavdêriyê ya Girtîgehê ve careke din hate astengkirin. Desteyê, bi hinceta ku Adîyaman û Çelîk “ji ber sûcên xwe poşman nebûne”, berdana wan taloq kir.
Berdana Adîyaman 5 meh, ya Çelîk jî 3 meh hat taloqkirin. Bi vê biryarê, berdana Adîyaman heta niha 5 caran, ya Çelîk jî 6 caran hatiye astengkirin.
Desteyê, derbarê Metîn Dalan ê ku 31 sal in girtî ye de biryara tahliyekirinê da. Dalan ê ku êvarê ji girtîgehê derket, ji aliyê Hevserokê Komeleya Alîkarî û Piştevaniyê ya bi Malbatên Girtî û Hikumxwaran re ya Marmarayê (MATUHAYDER) Zekî Kiliç û rêveberên komeleyê ve hat pêşwazîkirin.
Dalan li derveyî girtîgehê daxuyaniyeke kurt da û anî ziman ku rewşa girtiyan baş e û ew pêvajoyê ji nêz ve dişopînin. Dalan destnîşan kir ku ew piştgiriyê didin pêvajoyê û bawer dike ku dê aşitî bi ser bikeve. Dalan her wisa got, divê mafê hêviyê yê Rêber Apo bê pêkanîn û got, ev pêşketin dê beşdarî pêşveçûna saxlemtir a pêvajoyê bibe.
