Binpêkirinên mafan ên li girtîgehên Kurdistan û Tirkiyeyê, didomin. Herî dawî, li Elazigê girtiyan ji ber êşkence û binpêkirinên mafan dest bi greva birçîbûnê kir, lewma berdana bi sedan girtiyan bi hinceta biryarên ÎGK’ê tê astengkirin. Selîm Yildirim ku birayê girtiyê 30 salan ê nexweş Mehmet Saît Yildirim e, diyar kir ku ev binpêkirin li gorî ruhê pêvajoyê nîne got, bi vê bêhiqûqiyê bawerî çênabe.
Girtiyê 30 salan Mehmet Saît Yildirim ê li Girtîgeha Girtî ya Tîpa F a Hejmar 1 a Kiriklar a Îzmîrê, nexweşiya kronîk a dil pê re heye. Di meha Sibata borî de, cezayê wî qediya, lê ji aliyê Desteya Îdarî û Çavdêriyê ve ji bo 9 mehan hate taloqkirin. Desteyê bi hincetên “rewşa wî ne baş e”, “bi zimanê rêxistinî bi malbata xwe re axiviye” û “poşman nebûye” berdana Yildirim taloqî 27’ê Kanûna 2025’an kir ku divê 27’ê Sibatê hatiba berdan. Selîm Yildirim diyar kir ku mîna birayê wî bi sedan girtî rû bi rûyê vê bêhiqûqiyê ne û got, polîtîkayên li girtîgehan bêyî ku hiqûqa dijmintiyê kêm bibe, didome.
Selîm Yildirim got, “Li dijî gelê Kurd zilmek pêk tê. Girtiyên ku cezayên wan qediyane, nayên berdan. Em vê rewşê tenê dikarin bi hiqûqa dijmintiyê şîrove bikin. Ev bêhiqûqî nû nîne; Ji dema avabûna komarê û vir ve dewam dike.”
Yildirim destnîşan kir ku ji bo pêvajoya çareseriyê dewlet tişta ku dikeve ser milê xwe pêk nayîne û got, “Bi banga Birêz Ocalan re pêvajoyek hate destpêkirin. Di vê pêvajoyê timî gelê Kurd banga aştiyê kir. Lê belê gelê Tirk yan jî dewlet li gorî ruhê pêvajoyê tevnegeriya. Li girtîgehan girtiyên nexweş nayên berdan, êşkence dewam dike, înfaz bi hincetên kêfî tên taloqkirin.”
Yildirim qala paşeroja xwe jî kir û got, “Ez jî li DGM’ê hatim darizandin, lê di wê demê de pêkanînên evqas derhiqûqî nebûn. Di sala 2015’an de birayê min birin Îmraliyê. Nexweşê dil bû û anjiyo bûbû. Nexweşiya wî kirin hincet û piştî 9 rojan girtî ma, şandin girtîgeheke din. Birêz Ocalan jî ev rewş kiribû rojev. Mehmet Saît 9 sal in nayê berdan, li hucreya yekkesî tê girtin. Eger nerehet bibe, ti kes nîne ku alîkarî bide. Tevî biryara Dadgeha Zagona Bingehîn jî nabin cem hevalên wî.”
Yildirim herî dawî bang li desthilatdariyê kir û got, “Desthilatdarî divê li gorî ruhê pêvajoyê gavan bavêje. Destpêkê divê êşkence û binpêkirinên mafan bi dawî bibin.”
