Tevgera Azadiyê duh bi civîneke çapemeniyê li çiyayê Qendîlê di çarçoveya pêvajoya Aşitî û Civaka Demokratîk de gaveke din a dîrokî avêt.
Gaziyên Şer Ulkem Amed û Zarîn Kobanê jî di têkildarî vê pêngava dîrokî de ji ANF’ê re axivîn.
‘JI BO SERKETINA PÊVAJOYÊ DIVÊ JIN Û CIWAN TÊBIKOŞIN’
Gaziya şer Ulkem Amed bal kişand ser vê pêngava dîrokî û got, “Ji roja ku Rêber Apo banga Aşitî û Civaka Demokratîk kir heta niha Tevgera Azadiya Kurdistanê erken ku dikeve ser milên xwe bêdudilî pêk anî. Lewre tevgera me bi hemû kadro û mîlîtanên xwe ve bi Rêber Apo ve girêdayî ye. Ev gavê ku niha tê avêtin jî ji bo pêvajo leztir pêşbikeve û rê li ber provokasyonan bigire tê avêtin. Wek gaziyên şer em jî heya dawiyê ji Rêber Apo û Tevgera xwe bawer in. Ev gava dîrokî nîşan dide ku Rêber Apo û tevgera me ji bo pêkanîna aşitiyek mayînde çiqas cidî ne.”
Ulkem Amed anî ziman ku gavê herî girîng a ku dewleta Tirk wek bersiva van gavan bide azadiya fîzîkî ya Rêber Apo pêk anîn e û wiha got, “Em ê heya dawiyê ji bo serketina vê pêvajoya bi perspektîfa Rêber Apo têbikoşin. Banga min ji bo tevahî jin û ciwanan jî ew e ku ji bo serketina vê pêvajoyê li hemû deveran bila têbikoşin.”
‘JI BO SERKETINA PÊVAJOYÊ HÊVIYÊN ME ZÊDE NE’
Zarîn Kobanê jî di destpêka axaftina xwe de pêngava dîrokî ya Tevgera Azadiyê silav kir û got, “Ez tevahî gerîlayên azadiyê yên di vê pêngava dîrokî de cih girtine pîroz dikim. Em şahidî ji kêliyên dîrokî re dikin. Ji bo pêvajoya ku Rêber Apo daye destpê kirin, bêhtir pêş bikeve Tevgera Azadiyê gaveke din a dîrokî û girîng avêt. Divê herkes zanibe ku Rêber Apo û tevgera Apoyî tu caran nebûn alîgirên şer û rijandina xwînê.”
Gaziya şer Zarîn Kobanê destnîşan kir ku zêdetirî 50 salan e li ser esasê parastina rûmeta xwe berxwedanek tê meşandin û wiha dewam kir, “Hêviyên me ya ji bo serketina vê pêvajoyê pir zêde ye. Divê dewlet jî li gor wan gavên dîrokî yên ji bo pêşketina çareseriyê, erênî tevbigere û ji şaşitiyên xwe yên berê dersan derxe. Divê li Tirkiyeyê demldest gavên siyasî û qanûnî bên pêşxistin û azadiya fizîkî ya Rêber Apo pêk were. Gerîlayên azadiyê bi sedan kîlometre meşiyan û ji bo pêvajo bi serketinê bi encam bibe, xwe gihandin Herêmên Parastinê yên Medyayê. Ez careke din wan hevalan ji dil û can silav dikim.”
